Dowers: Impacto cu atraconan tin riba nos isla ta enorme

ORANJESTAD – Impacto cu atraconan tin riba nos isla ta enorme. Asina e mandatario di husticia Arthur Dowers a confirma pa NoticiaCla.com recientemente. E ta admiti pues cu cos no ta bon. Di otro banda, e mandatario ta considera nos comunidad, un di esunnan mas safe den mundo. “Danki Dios pa esey” Dowers a bisa NoticiaCla recientemente. E motibo segun e mandatario, ta cu a inverti hopi den seguridad den nos pais, y den nos hendenan. Pero ta keda e risico cu ta hendenan cu ta drenta nos isla como turista, y despues ta busca caminda di bay horta nos pais. “E grupo ey nos ta bezig ta ataca pisa riba dje” e mandatario a sigui bisa. Tambe tin e grupo local cu ta comete crimen y ta hendenan cu a crece como criminal.

VARIOS CRIMEN A BAHA

E mandatario (aunke no por a mustra cifra ainda) ta sigura e portal aki cu cierto crimennan a baha considerablemente. E crimen aki cu ta baha, ta pasobra a bira mas complica pa yega na placa. Ta papia entre otro di robo di auto pa piesa etc. Esey ta nifica cu ta bay busca e forma facil pa horta y ta uza hende vulnerabel pa logra nan meta. Rancamento di cartera ta entre otro algun di nan. E mandatario ta admiti cu e atraconan riba nos isla, tin hopi impacto riba nos isla. Mientras cu e atraconan tin biaha ta cosnan di menos balor, e impacto si ta grandisimo.

NO COMPARA ARUBA CU P.E. JAMAICA

Un di e criticanan ta cu constantemente mandatario y autoridad ta compara Aruba cu un isla of destinacion hopi mas pio, pa mustra con safe nos isla ta. E mandatario sinembargo ta mustra cu si nos bay bisa cu nos ta ‘unsafe’, e pregunta ta bira e ora ; unsafe compara cu ken?. “Nan ta bisa, no compara nos cu Jamaica, y no necesariamente ta compara nos cu Jamaica” Dowers a sigui bisa. “Si bo ta un victima, bo no por tin ningun argumento pa bisa e persona cu ta victima, ‘tende, nos ta hopi safe’, pasobra e mesun persona ey a bira victima. “Si un hende nunca a bira victima di nada, e por ta no ta sinti mescos cu un hende cu si a bira victima”. Un hende cu a custumbra cu cos ta hopi unsafe, ta sinti su mes hopi safe den un area cu no ta safe. “Kiermen, loke bo tin cu uza ta cifra inderdaad. E cifranan bo ta compara nan cu otro caminda, y pa trankilisa hende, ta mustra kico tur nos ta haci”, e mandatario a sigui bisa. SCUCHA E ENTREVISTA AKI