Introduccion di ‘impuesto di transaccion’ a crea ola di reaccion

ORANJESTAD – E noticia cu gobierno ta introduci un ‘impuesto di transaccion’ no a cay nada bon den comunidad. Mientras cu e unico informacion cu tin ta, cu esaki lo ta 1% y lo cobra esaki riba cada transaccion bancario di transferencia, no tin mucho mas informacion Aruba. Pero e solo hecho cu e destinacion ta pa cubri cierto proyectonan ambicioso di e gobierno, tin hopi hende hopi hostina. Mas ainda pasobra segun nan, ta aumenta impuesto, pero no ta mira senjal cu gobierno no ta bahando gasto di nan banda. Comercio tambe ta rabia riba esaki pasobra nan ta mira cu esaki lo por perhudica nan tambe. 

 Manera e informacion cu tin aworaki ta indica, e placa recauda lo tin cu bay pa e.o. e proyecto di green corridor y hospital nobo. E comentarionan no ta nada positivo, si mester lesa y kere e comentarionan riba medionan social, y den esaki nos kier men Facebook. E medio aki a bira e caminda unda pueblo awor ta ‘expresa su mes’ y den e caso aki, esaki no tabata diferente.

Critica manera ‘nos tin cu lanta nos placa y pone bou di matras atrobe’, of ‘nos ta saca nos placa pa hibe otro caminda’ ta simplemente algun di e comentarionan cu por a tende y lesa di ciudadanonan cu ta hostina cu e asunto aki. Tambe algun a te hasta comenta riba e hecho cu awor banconan lo aumenta nan tarifa pa servicio tambe ya cu introduccion di e impuesto aki, lo por nifica mas administracion cu tambe ta costa mas placa. Ta conoci mientrastanto cu recientemente algun banco a aumenta nan tarifanan pa servicio caba.

Un otro topico di critica ta e impuesto di destinacion (bestemmings belasting) cu mester a keda introduci dia 1 di september ultimo pa yuda AZV. Algo cu ainda no a cuminsa pero cu si, cierto comerciantenan lo a cuminsa cobra caba sin cu esaki ta permiti. Recientemente vocero di departamento di impuesto a bisa caba cu si cobra pa e impuesto awor, ta algo illegal y por yama polis pa esun cu cobra esaki. No ta conoci con lo por controla y para esaki, ni cuanto establecimento ta haciendo nan mes culpabel na e practica aki.