Keho na Landsrecherche (Corsou) por solamente cu afspraak

WILLEMSTAD – Hefe di Landsrecherche Curaçao a informa awe mainta cu entrante awe no por tuma keho mas sin un afspraak. “Esnan cu ke duna keho tin cu yama e number 465-0402 pa un cita pa seguidamente e funcionario di Landsrecherche ta tuma e keho” e informacion a bisa. Raiz entre otro di e anuncio aki ta e hecho cu e dos dianan aki politiconan Gerrit Schotte y Charles Cooper a entrega keho contra un parlamentario. “Nan ta yega y laga carta atras. Esey no ta keho” vocero di ministerio publico Norman Serphos a splica NoticiaCla.com awemainta. Como tal ta entre otro e accionnan aki a conduci na clarificacion di con ta entrega keho.

CON PA ENTREGA KEHO

Tur ciudadano por haci denuncia di un hecho castigabel. Punto di salida ta cu ta haci denuncia cerca polis of Landsrecherche, ora ta trata di casonan unda tin un of mas funcionario publico envolvi, pa asina duna e investigador posibilidad pa por ehempel di haci pregunta adicional, manera entre otro detaye con e suceso a pasa pa asina yuda e investigacion. "Djis entrega of deposita un carta no ta suficiente. E keho tin cu keda procesa pa un recherche", asina sr. Medgar Elisa, Hefe di Landsrecherche Curaçao a declara. Ora haci un denuncia tin cu tene cuenta cu e proceso por tuma algun ora pa keda procesa. Landsrecherche Curaçao ta gradici tur hende pa su comprension y cooperacion, e carta ta finalisa bisando.