Preocupacion atrobe cu Rusia por bira doño di CITGO na Merca

WASHINGTON – Un biaha mas e menaza di toma di e compania CITGO door di Rusia ta den noticia. E biaha aki congresistanan y senadornan Mericano ta preocupa cu e posibilidad cu e compania Ruso Rosneft por tuma e compania Mericano over, segun un relato di CNN Money. Si Venezuela, doño di e compania Mericano no por cumpli cu su obligacion di paga un prestamo na e compania Ruso, esaki por bira doño di e compania. Den pasado caba esaki tabata den noticia pero tanto na Aruba como na Merca a desmenti e embergadura di e noticia.

CONGRESISTANAN Y SENADORNAN PREOCUPA

Segun un reportahe pa e seccion financiero di CNN e siman aki, tanto congresistanan republicano y democrata ta ‘hopi alarma’. Den cartanan hopi fuerte pa presidente Trump den ultimo dianan, e congresista y senadornan a alerta cu e por ta un problema grandi pa seguridad nacional Mericano si Rusia bira doño di CITGO. “Nos ta extremadamente preocupa cu Rosneft’s su control di un proveedor principal di energia Mericano por bira un menaza serio pa e seguridad di energia Mericano, impacta e fluho y prijs di gasolin pa e consumidor Mericano y expone e infrastructura Mericano pa menasa nacional di seguridad” un grupo di senador, lidera pa e republicano Marco Rubio y Bob Menendez a bisa den un carta pa minister di finanza Mericano Steve Mnuchin. Esaki ta bin mientras cu tension ta halto entre Merca y Rusia riba e conflicto na Syria, crimen cybernetico, y Rusia metiendo den eleccion Mericano.

CON ESAKI A SOSODE

A cambio di un prestamo na december ultimo di Rosneft, e compania Venezolano PDVSA a ofrece 49.9% di accion como colateral. Si PDVSA no paga su debenan na tempo, Rosneft por tuma control di CITGO. Tur loke cu e tin cu haci, ta cumpra algun accion mas di e refineria pa pasa riba e 50% di propiedad. Segun e raportahe di CNN ta sigui menciona, Rusonan tin hopi beneficio cu transferencia di accion pa e compania Mericano. “Nos ta urgi bo atencion inmediato y reviso den e asunto aki” congresista Albio Sires a bisa den un carta pa e minister concerni.

Tin indicacion cu pa fin di aña, Venezuela (of PDVSA) lo ta sin placa, cu ta nifica cu nan lo no por paga e debe bek, cu tur consecuencia. Ta spera cu na october caba, lo por tin e prome señal di problema.

EFECTO PA ARUBA

Den pasado caba gobierno di Aruba a sigura e portal aki cu cualkier tipo di accion asina, no ta afecta e CITGO deal di Aruba.