Nos Staatsregeling no conoce minister riba ‘non-actief’

ORANJESTAD – Mientras cu minister Paul Croes recientemente a ‘hala atras’ temporalmente pa motibo di investigacion contra dje pa e.o. corupcion y labamento di placa, oficialmente e ta keda e minister den funcion. NoticiaCla.com tin confirma cu mientras cu e investigacion di ministerio publico ta sigui den e caso, gobierno no a haci e cambio ‘oficial’ segun LIM (Landsverordening Ministeriële Instelling). Hecho ta cu te ainda gobierno publicamente no a presenta ningun documento cu ta establece e decision cu a wordo tuma, si esaki ta tuma, y menos ainda, a base di ki regla of ley a tuma e decision di laga e mandatario bay riba ‘non-actief’. Te awor, tur esaki ta desconoci publicamente. Mientrastanto manera cu e portal a raporta caba, e minister en cuestion a busca asistencia di abogado renombra di Corsou, Marije Vaders. Algo cu e abogado mes a confirma pa e portal aki.

RESPONSABEL PA CARTERA AINDA

Esey ta nifica cu en realidad Paul Croes ainda ta responsabel pa su cartera. Den practica, e ta nifica cu e minister cu a haya su carteranan, no ta autorisa pa firma nada di e cartera. Pues tin un minister cu mas trabou, pero no por oficialisa e documentonan legalmente.  

PROCESO SEGUN STAATSREGELING

Investigacion cu NoticiaCla.com a haci ta mustra cu nos staatsregeling no conoce e fenomeno cu un minister ta bay ariba "non-actief". Esaki ta implica cu si e minister no ta malo, ni tampoco ta den exterior y Staten no ta termina confiansa den e minister, de facto e ta keda cu autoridad como minister y como tal tin tur derecho di firma formalmente pa su Ministerio. Ademas ora cu retira un minister, esaki ta regla pa ley. Pero no ora cu ta pone un minister riba 'non-actief'. 

MINISTER CROES POR FIRMA AINDA

Esaki ta encera cu si Minister Paul Croes firma un decision awe como e Minister di Asunto Social, Hubentud y Labor, elo ta un decision legal. Esaki ta e consecuencia directo cu no a scoge pa retiro di e minister. Es mas, e asunto aki ta uno hopi serio, pasobra tecnicamente e minister cu ta sospecha di a comete fraude ainda por firma "ontheffing" di permiso, cual ta e asunto cardinal cu ta bou investigacion door di Ministerio Publico.

CARGONAN CONTRA E MANDATARIO

Manera ta conoci, dia 28 di maart ultimo, bou guia di Ministerio Publico di Aruba, Landsrecherche, den cooperacion cu RST (Recherche Samenwerkings Team) y Cuerpo Policial di Aruba a investiga posibel casonan di corupcion activo y pasivo. E investigacion aki a dirigi su mes riba e sospecho cu e Minister di Asuntonan Social, Hubentud y Labor, conhuntamente cu varios di su trahadornan, a tuma regalonan, promesanan y/of servicionan relaciona cu ontheffingnan di e arbeidsmarkttoets, dor di cual stranheronan a wordo poni den oportunidad pa haya permisonan laboral. Durante e investigacion, e sospecho a surgi cu e Minister a haci su mes culpabel na ambtsmisbruik y a duna personanan cu no tabata mag di traha na Aruba a base di nan verblijfstitel, oportunidad pa traha na Aruba. Tambe e sospecho a lanta cu e Minister a haci su mes culpable, conhuntamente cu otronan, di intencionalmente laba placa di e sobornonan ricibi.

E sospecho ta cu e ambtelijke corruptie ta consisti primordialmente di pidi y/of tuma sobornonan en cambio di ontheffing di e arbeidsmarkttoets. Un arbeidsmarkttoets positivo di Departamento di Progreso Laboral (DPL), of un ontheffing di e toets aki, ta un condicion pa dunamento un permiso di trabou na Aruba dor di Departamento di Integracion Maneho y Admision di Stranhero (DIMAS).