Minister ta reacciona riba cancelacion buelonan

ORANJESTAD – Motibo pa cual Southwest Airlines a kita dos buelo pa Aruba pa otro aña for di Atlanta ta pasobra e no ta un bon coneccion. “Nan a shift e buelonan pa Baltimore unda cu tin miho connectivity na e momentonan aki” minister Otmar Oduber a sigura NoticiaCla.com diaranson mainta. E la confirma e cambio aki y a bisa tambe cu e ‘load factors’ (cantidad di pasahero riba un avion) pa e proximo lunanan pa Aruba ta mustra bon. “E ta bon pa e lunanan benidero /high season” Oduber a sigui bisa NoticiaCla.com. Mas informacion e mandatario no por y kier a divulga na e momento ey.

 Tabata diamars cu e compania Southwest Airlines a anuncia cu otro aña maart, ta laga dos buelo semanal di e ruta Atlanta-Aruba y Atlanta-Montego Bay cay. E aerolinja no ta bisa pakico pero e no ta inusual cu aerolineanan ta reduci nan frecuencia despues di cierto temporada. E ta remarcable si cu apenas algun siman pasa Southwest a presenta su mes na Aruba como e doño nobo di ‘Air Tran’ tumando tur e rutanan over e tempo ey y cu nan lo tin tur confiansa pa expansion despues di un periodo. American Airlines mientrastanto a anuncia un aumento di 7 buelo semanal comienso di november proximo. Pero aki tambe a indica caba tambe cu nan lo por reduci esaki despues di e temporada halto.

Prome di July ultimo cu e mesun Southwest Airlines a uza Aruba como e prome destinacion internacional pa bula. E tempo ey a anuncia cu e buelonan lo ta for di Orland, Atlanta y Baltimore, cu ta e rutanan di antes di Air Tran tambe. “Nan lo crea oportunidadnan grandi pa nos por diversifica nos mercado turistico na Merca mes teniendo na cuenta cu Southwest ta e aerolinea local di mas grandi y esun cu ta conta cu mas clientenan fiel” Teresa Laraba, Senior Vice President of Customers a bisa na e ocasion ey. Nota: e foto archivo ta di yegada di e prome buelo di Southwest Airlines na Aruba na july ultimo.