Companianan bringando gobierno den corte pa beach policy

ORANJESTAD -  Despues cu gobierno a bin cu e maneho nobo pa beach na Aruba, e asina yama beach policy, varios compania a cuminsa caso contra gobierno. Miembro di management team di e departamento di gobierno encarga cu e control, DIP esta Isabel Dammers a confirma esey. “Obviamente nos a haya algun caso den Corte” Dammers a bisa. Segun Dammers,  tin obhecion di banda di hotelnan y watersport encuanto e ubicacion of cuanto e haltura di tarifa. “ Pero esey no ta nifica cu nan por sigui sin permiso. Ta asina cu tur hende tin derecho di bay Corte y nos tin derecho di haya uitspraak di Hues riba dje, nos lo ehecuta esey tambe pero mientrastanto bo mester percura cu bo tin un permiso”. Esun cu nos a cobra di mas, DIP lo restitui e ora ey. “Den todo caso bo mester tin un permiso pa haci uzo di tereno di pais Aruba riba beach”, asina Dammers a termina bisando. Foto visitaruba.com