Caso di mericano perdi na Aruba, topico di premiere di programa televisa na Merca

NEW YORK – Diabierna ultimo un caso cu a tuma lugar na Aruba 6 aña pasa di un mericano cu a disparce mescos cu na 2005, tabata topico di un programa di television. Ruman muher di Robin Gardner cu na 2011 a perde na Aruba na Baby Beach, a confronta e supuesto responsabel pa e morto, e amigo Gary Giordano. E programa You the Jury, a pone e ruman muher Danielle Colson-Unglesbee dilanti Giordano, unda cu e ruman a publicamente acusa Giordano di ta responsabel pa morto di su ruman. Mientras cu e no ta e ‘closure’ cu por a haya, e tabata satisfecho cu e por a bisa esun responsabel pa desaparicion y posibel morto di Robin, kico e tabata pensa di dje.

E PROGRAMA

Segun e raportahe, Colson-Unglesbee a stop di wak television pa 9 luna despues di desaparicion di su ruman. E tabata cansa di prensa y kier a recorda su ruman den paz. Pero diabierna den e debut di e programa controversial na FOX, el a confronta e homber. “Bo ta un monster den mi wowonan. Tur prueba presenta awe aki ta prueba cu abo ta culpabel” el a bisa Giordano. “Y awe bo tin cu acepta responsabilidad pa esaki. Bo a purba di nenga bo actonan pero bo ta djis cubri mentiranan bieu cu mentiranan nobo. Mi ta spera cu Merca mira bo pa e cobarde cu bo ta” e ruman a bisa. Ora cu tabata turno pa Giordano papia, el a ofrece disculpa, pero a nenga cu ta el a mata Gardner. El a pidi permiso pa dune un braza pero e ruman a nenga.

KICO A SOSODE

Na juli 2011 Gardner a perde su trabou, y a bisa su guy di e tempo ey cu e ta bay Orlando cu famia. Sinembargo el a bay cu Giordano pa Aruba. Nan a topa riba internet y djey a biaha pa Aruba. Giordano a sera un poliza di seguro di 1.5 miyon dollar pa nan dos, incluyendo un poliza di morto accidental. Dos dia despues di ta na Aruba Giordano a raporta Gardner como perdi, despues di a bay den laman na Rodgers Beach. Polis a detene Giordano pa un periodo, pero despues di 3 luna, el a wordo libera y a bandona Aruba. Dos aña despues, autoridad di Aruba a sigura cu e caso no tabata ‘activo’ mas pero cu nan ta sigui pensa cu Giordano ta culpabel. Na 2014 caba Colson-Unglesbee a sinta dilanti Giordano den programa di Dr Phil. Foto cortesia FACEBOOK.