Directiva nobo di ATA cla pa wordo formaliza

ORANJESTAD – Casi 10 luna despues cu e miembronan di AHATA a retira ‘en-bloc’ di e directiva di ATA na juni aña pasa, e nombernan pa e directiva nobo di ATA ta conoci. Ta trata di entre otro Lisette Malmberg, Jeanine Huistra y Alex Niewmeyer cu ta representa Aruba Hotel & Tourism Association (AHATA), mientras cu e miembronan Ronny van Trigt, Naomi Chan y James Fazzio ta representa Aruba Tourism Association (ATA) y Marieta Ras ta keda apunta como e presidente di e directiva. Mientras cu ta positivo cu porfin a keda cla cu e nombramento, e forma cu esaki a tuma lugar no tabata manera cu e ley lo ta stipula. NoticiaCla.com a haya confirmacion cu cos no a bay ‘manera cu nan mester bay normalmente’. Entre nan tin e hecho cu una bes cu tin e candidatonan di cada banda, entre nan lo mester scoge un presidente.

PROBLEMA PA NOMBRA UN PRESIDENTE

Fuentenan cerca di e proceso a confirma cu entre nan, e intencion tabata pa nombra Ronny van Trigt como e presidente, pero cu esey no tabata un opcion ya cu van Trigt no tabata interesa. Si ta asina cu e miembronan entre nan mester a presenta un candidato pa e presidente, y e portal aki a compronde cu e nomber lo tabata otro cu esun cu minister tabata kier. Fuentenan ta mustra cu minister su preferencia finalmente ta esun cu a bay y cu esaki lo ta Ras cu ta bira e proximo presidente di e directiva. “Finalmente ta minister ta esun cu ta dicidi”, ta loke e portal aki a tende di fuentenan. E portal aki despues a tuma contacto cu e CEO di ATA Ronella Tjin Asjoe cu solamente kier a  confirma cu e proceso enberdad ta andando, pero cu e nombramentonan no ta cla ainda y cu mester pasa e landsbesluitnan pa formalisa e nombramentonan. Riba e nombernan mes TjinAsjoe no kier a duna comentario si enberdad esaki ta enberdad e lista. Pero NoticiaCla.com tin e nombernan confirma di su fuentenan cu no ta faya.

E RETIRO EN BLOC

Tabata aña pasa juni cu representantenan di AHATA den e board di Aruba Tourism Authority (ATA) a retira nan sosten 'en bloc' manera cu e portal aki a raporta caba. Pa medio di un carta cu NoticiaCla.com a tuma nota di dje, e tres miembronan cu tabata representa AHATA den e board, Joe Najjar (La Cabana), Jim Hepple (AHATA) y Javier Wolter (CMB) e tempo ey a informa ATA pa medio di e carta, cu nan no ta forma parti mas di e directiva. Motibonan no tabata specifico, pero tabatin un cantidad di asunto cu a conduci na e decision 'abrupto' aki. Esnan cu a keda aden tabata Simon Arends, Myrna Jansen y Peter de Hoop hunto cu e presidente Jossy Lacle. Casi un luna despues cu tres miembro di AHATA a sali 'en bloc' for di e directiva di Aruba Tourism Authority S.G. (ATA), e situacion den ATA a keda mescos. Pa loke ta e funcionamento di e directiva, esaki no a cambia. "ATA ta sigui draai confirme ley y cargando nan responsabilidad, a bisa e tempo ey. No manera otronan cu a opta pa chantagia" e awor ex mandatario responsabel pa turismo, Otmar Oduber a sigura NoticiaCla.com e tempo ey.

RETIRO DI TUR MIEMBRO DI DIRECTIVA

Tabata despues cu a conoce cambio di minister di turismo, y cu minister Mike de Meza a asumi e funcion di minister di Turismo, ela retira tur otro miembro di directiva di ATA. E acto aki a wordo hopi cuestiona si tene na cuenta cu pa ley, contrario na otro nv'nan di gobierno, no tabata posibel pa haci tal 'maniobra'. Ta danki na boluntad di algun di  ex miembronan, cu por a haci e cambionan pa awor tin un directiva nobo.  E tempo ey a critica cu a laga e ‘bapor sin capitan’, y cu solamente e CEO na cabes, pero sin un directiva pa tuma decisionnan crucial. Awor e proceso ta asina leu cu dentro di poco por pasa e landsbesluit cu por nombra e miembronan nobo di e directiva.