A cuminsa restaura mangrove na comienso di Spaans Lagoen

SPAANS LAGOON – Trabounan di restauracion a inicia awe riba e area di mangrove na parti noord di Spaans Lagoen banda di e Franse Pas. E construccion di e brug lamentablemente a resulta den perdida di un area di mangrove. Y mientras cu DOW y e contratistanan, cu conseho di Wageningen Environmental Research (Alterra), a haci nan ‘best’ pa minimalisa e perdida y daño, nan ta reconoce e necesidad pa purba compensa pa e perdida. Hunto cu Alterra nan a identifica un area pa nort di e lagoen unda cu lo coba e silt y santo y esey lo wordo remove di e sitio.

COBA CANAL

Basa riba un calculacion cuidadoso, un canal den forma di un ‘S’, lo wordo coba di 150m largo y 2.5 hancho entre e laman habri y e caminda. E lo ta suficiente hundo pa mantene e awa na un profundidad di 50 cm, te hasta ora cu marea ta abou. Na e otro banda di e canal, lo coba pidanan abou na un forma cu lo permiti parha pa come y pa mangrove nobo crece. E marea lo subi y baha e bandanan coba y ta crea un bon condicion pa e mangrove crece. E hanchura di e cobamento, incluyendo e canal central, lo ta 20 meter y lo extende pa 90 meter banda di e canal.

BISHITA DI PRINSES

Prinses Beatrix tabata entusiasma pa cu e restauracion ora cu el a tende di esaki durante su bishita recien na e lagoen como parti di Parke Arikok siman pasa. Mientras cu e restauracion ta diseña pa encurasha regeneracion natural di mangrove, Parke ta spera cu e ta duna voluntarionan y e miembronan di comunidad local e chens pa planta mangrove tambe na e liña coba, pa esaki por acelera e proceso di crecemento.

OPORTUNIDAD PA DRECHA COS

Segun Dr Lawrence Jones-Walters di Alterra, e ta contento cu nan tin e oportunidad pa crea un area pa compensa e perdida di mangrove na e lagoen. E ta kere cu nan tin un bon plan y cu e ta spera cu e lo bira un exito pasobra semper bo ta den man di e condicion climatologico local, hopi seco of hopi muha. “Pero nos lo tin e expertonan local vigilando e sitio y tin cosnan cu nos por haci pa traha trampa di lima”