Kiwanis na Aruba a entrega 'zippie voyage stroller' na baby Zia

ORANJESTAD- Diabierna ultimo den un ambiente Kiwanistico, e tres club nan di Kiwanis na Aruba: Kiwanis Club of Aruba, Kiwanis Club of Palm Beach y Kiwanis Club of Young Professionals Aruba a reuni pa haci entrega di un check balora na AWG 9050,- na baby Zia, contribuyendo asina pa baby Zia haya su “Zippie Voyage Stroller”.

Kiwanis su enfasis ta pa sirbi e muchanan na Aruba, por lo tanto, ora cu e clubnan a ricibi e peticion pa e donacion y a lesa e storia di baby Zia su “Cerebral Palsy” via e plataforma social, a keda conmovi y di biaha a tuma contacto cu otro club y uni forza, pa contribui na un mihor calidad di bida pa baby Zia.

E momento mas emocionante di e anochi tabata ora cu presidente di Kiwanis Club of Aruba, sra. Aurora Dijkhoff, presidente di Kiwanis Club of Palm Beach, sr. Chejito Croes y presidente di Kiwanis Club of Young Professionals Aruba, sr. Bryan Nemecek, den presencia di e miembronan di dicho club, a sorpresa e mama Mariela y baby Zia cu e check pa e “Zippie Voyage Stroller”. Mama di baby Zia a keda sumanente contento y a expresa su gran gratitud na henter e famia grandi di Kiwanis.