Hues a sentencia 18 persona pa incumplimento di inkomstenbelasting

ORANJESTAD – Dia 4 di april ultimo 18 sospechoso mester a presenta na Corte den Prome Instancia pa un sesion special di casonan fiscal. Hues a sentencia tur 18 persona cu boet di maximo Afl. 3.000,-, pa motibo cu nan no a haci declaracion di inkomstenbelasting y prima di seguro social di an?a 2011, 2012 y/of 2013 of no a haci e declaracion dentro di e termino stipula. E suma total di boet impone ta Afl. 44.000,- di cual Afl. 19.750,- a wordo impone condicionalmente.

E maneho pa loke ta trata e persecusion penal di e personanan cu no ta haci declaracion of no ta haci declaracion dentro di e termino stipula y cu ta viola ley di belasting, lo continua durante e an?a aki. Periodicamente lo presenta e tipo di casonan fiscal aki na hues. E siguiente sesionnan di corte ta planea pa tuma lugar dia 24 mei y 7 di juni proximo.

Ta bon pa remarca cu ora hues duna un veredicto cu ta indica un castigo, esaki lo tin como consecuencia tambe cu e asina yama ‘strafkaart’ di e persona ta wordo yena cu e castigo ey. Esaki ta algo cu por wordo preveni.

Departamento di Impuesto ta haci un apelacion na su clientenan pa cumpli cu entregamento di e declaracion di inkomstenbelasting of cualkier otro tipo di belasting dentro di e termino stipula pa evita consecuencianan serio y indesea.