Peterson: ‘No tin ningun conflicto grandi na Parke Arikok’

ORANJESTAD – “No tin ningun conflicto grandi na Parke Arikok”. Esey tabata prome reaccion di e presidente di fundacion Parke Arikok Greg Peterson na NoticiaCla.com relaciona cu un informacion cu a sali den matutino Diario awe mainta. Mientras cu el a pidi espacio pa investiga unda e informacionnan ta saliendo, el a duna e reaccion chikito. “Tanto e directiva (di Parke Arikok) y (Sindicato) Seppa lo ta investigando ken ta sacando informacion falso y pakico. Ni e directiva  ni Seppa ta na altura di un ‘conflicto grandi’. Al contrario, nos ta trahando hopi bon hunto”, Peterson a bisa brevemente. E articulo di e matutino ta papia di ‘conflicto grandi den Parke Arikok cu ta menaza di hasta bira den un accion laboral’. Ta haci mencion entre otro di un forma no apropia di actuacion di e directora nobo, y cu tin un desacuerdo cu e trahadornan.