InselAir no a aprecia ‘reunion’ di gobierno cu doñonan di Avianca

WILLEMSTAD – E compania doño di e aerolinea colombiano Avianca esta Synergy Aerospace no ta bay sigui reuni cu gobierno di Corsou, sin presencia di e comisario apunta pa Corte, encarga cu e proteccion di bancarota di InselAir International. Asina e CEO Gilles Filiatrealt y e comisario di aerolinea van den Heuvel na Corsou a manda bisa minister di economia Errol Goeloe den un carta cu ta den poder di NoticiaCla.com. Esaki ta despues di e reunion cu gobierno di Corsou a tene recientemente na Miami cu Synergy Aerospace. Gerencia di e aerolinea, segun e carta, a compronde cu apartemente   (gobierno) no a tene nan mes na e sugerencia di e mayoria den parlamento, unda cu a sugeri pa e sosten financiero mester wordo para. Algo cu gerencia no ta pro pa sosode. “Cualkier descontinuacion di financiamento cu ta de hecho e presupuesto operacional, lo nifica un risico riba continuacion di e operacion di e aerolinea, pa no menciona mes e crecemento modesto, y lo aumenta mas retiro.

Mirando e situacion actual, gerencia a sugeri na e mandatario pa gobierno stop di tene cualkier otro conversacion of negosaicon cu partnernan strategico, sin envolvimento di gerencia di InselAir, e conseho di supervision , y e comisario. A mustra e mandatario di e importancia pa e envolvimento di e compania, mirando e loke tin riba wega aki (posibel bancarota di e compania) pa cual corte a apunta e comisario special cu tin cu cuida e interes di compania. Como tal , basa riba e informacionnan ricibi, doñonan di Avianca, Synergy Aerospace a bisa cu lo no entretene ningun combersacion sin presencia di e comisario apunta.

Den un comentario di miembro di e partido formando gobierno, Gerrit Schotte, ta mustra cu ta e ex minister Eugene Ruggenaath y Jose Jardim ta responsabel si 600 trahado perde nan trabou, debi na e intervencion di nan den e caso aki (Jardim ta presidente comisario di InselAir International, y cu nan lo a ‘buta traba’ pa cualkier deal cu por scapa cuponan di trabou. Lesa e carta AKI.