DCA: Wardando’ riba InselAir Aruba pa unground e avionnan

ORANJESTAD – E avionnan cu Directie Luchtvaart di Aruba a ground algun tempo atras di InselAir Aruba, ainda ta geground. Esey no a cambia. Asina e director Edwin Kelly a confirma na NoticiaCla.com. “Nos ta wardando riba nan. Nos tabata hopi cla cu nan loke mester wordo haci” Kelly a bisa. “Tur cos ta den nan man y nos ta wardando mas bien riba nan pa por sigui traha cu nan, pa por yega na e momento cu (nan) por bula bek” e director a sigui bisa.

NO BULA POR RESULTA DEN KITA LICENCIA

E hecho cu e aerolinea no ta bulando pa un tempo caba, por nifica cu e por perde su licencia tambe. “Si pa tanto tempo bo no bula, por kita e licencia. Esey ta na discrecion di Directie Luchtvaart y minister” Kelly a bisa, y ta algo cu ta wardando ainda. “Nos ta dunando nan e chens pa haci pa nan por yega na e punto pa nan por bula bek” e director a sigui bisa, indicando cu no ta mira ainda cu lo e yega asina leu te pa e aerolinea perde nan licencia. Den e caso aki, no ta ‘culpa’ di e aerolinea cu nan no ta bulando, segun e trahadornan mes a bisa un tempo atras, pero culpa di DCA cu a ground nan, sin cu e trahadornan y directornan sa pakico.

STATUS QUO RIBA PAGO Y SCHENKING?

Mientrastanto e situacion ta status quo pa e aerolinea local, y ta mas bien trahadornan ta den ‘scuridad’ ainda y no sa kico ta kico riba e tereno ey. Ainda nan no a ricibi nada di pago tampoco. NoticiaCla.com a busca comunicacion cu e minister encarga pa sa con a para cu e reunion y informacion suministra recientemente pa e trahadonan, y pa wak si por haya e ‘schenking’ manera cu a solicita. Pero no tabata exitoso den esey.