Schwengle: Problema di dump ilegal na Tamarijn tin mi atencion

ORANJESTAD – Gobierno di Aruba ta preocupa cu e situacion di e dump ilegal na Tamarijn. “Cualkier dump tin potencial di ta hopi peligroso pa salud di bo pueblo” minister di Salubridad Alex Schwengle a bisa NoticiaCla.com awe mainta. Un maneho moderno y consistente ta importante segun e mandatario. “E dump aki mester wordo opgeruimd” Schwengle a sigui bisa. E tin contacto cu su colega di medio ambiente (de Meza) y tin su atencion.

CUALKIER DUMP ILEGAL TA PELIGROSO

“Cualkier dump ilegal, riba su mes caba ta peligroso pasobra bo no sa kico nan ta dump” E mandatario a sigui bisa. E dump ta trece tur tipo di bestia ahigienico cu por transmiti malesa riba hende of entre hende. Un di e problemanan ta cu ora cu ta trata un tereno priva, GKMB no tin aceso. Esey no ta algo cu bo kier segun e mandatario. Tin leynan sinembargo cu ta ‘in place’ cu ta pone cu gobierno por actua si ta necesario. Si e peliger ta asina grandi, gobierno por cay aden y wak kico tin cu haci. Pero no por pasa sin mas riba derecho di hende nan propiedad.

DUMP ILEGAL NA CANDELA

Segun e mandatario, un dump ilegal na candela ta mas pio ainda pasobra bo no sa kico tin eyden, incluyendo e huma. “Y esey ta un peliger hopi grandi, no solamente di un manera agudo sino tambe a largo plazo. Pasobra nos sa cu exposicion na huma toxico cu bo no sa kico tin aden, por duna bronchitis agudo pero tambe chronico”. E mandatario a sigura cu e situacion tin su atencion. “Mi ta bay ministerraad y den e ministerraad mi lo bay discuti’e cu mi colega y pa nos bay tuma stap pa preveni cosnan asina di pasa pa 1. Evita candela, y 2. Kico nos t'ey haci cu tur e dumpnan ilegal aki.