Southwest Airlines ta kita 2 buelo di Aruba

DALLAS – E compania Southwest Airlines a anuncia cu otro aña maart, ta laga dos buelo semanal di e ruta Atlanta-Aruba y Atlanta-Montego Bay cay. E aerolinja no ta bisa pakico pero e no ta inusual cu aerolineanan ta reduci nan frecuencia despues di cierto temporada. E ta remarcable si cu apenas algun siman pasa Southwest a presenta su mes na Aruba como e doño nobo di ‘Air Tran’ tumando tur e rutanan over e tempo ey y cu nan lo tin tur confiansa pa expansion despues di un periodo. American Airlines mientrastanto a anuncia un aumento di 7 buelo semanal comienso di november proximo. Pero aki tambe a indica caba tambe cu nan lo por reduci esaki despues di e temporada halto.

Tabata dia 1 di July ultimo cu e mesun Southwest Airlines a uza Aruba como e prome destinacion internacional pa bula. E tempo ey a anuncia cu e buelonan lo ta for di Orland, Atlanta y Baltimore, cu ta e rutanan di antes di Air Tran tambe. “Nan lo crea oportunidadnan grandi pa nos por diversifica nos mercado turistico na Merca mes teniendo na cuenta cu Southwest ta e aerolinea local di mas grandi y esun cu ta conta cu mas clientenan fiel” Teresa Laraba, Senior Vice President of Customers a bisa na e ocasion ey.

NoticiaCla.com a busca comentario di e titular di Turismo riba e materia aki pero ainda no a logra haya su comentario. Mientrastanto oposicion a cuestiona e ‘silencio’ di e mandatario riba e topico aki. “Awor cu un otro aerolinja ta cancela su buelonan pa Aruba si bo no ta tende di dje” parlamentario di partido MEP Dangui Oduber a remarca riba su pagina di Facebook.