Ezzard Cillie ‘front runner’ pa bira director interino Hospital

ORANJESTAD – Mientras cu mas probable fin di diamars, lo por tin e anuncio di e proximo director (interino ) di hospital, tin tur indicacion cu esaki lo por bira e actual beleidsmedewerker ‘Ezzard Cillie. Cillie su candidatura ta conta cu sosten di hopi grupo dentro di hospital Horacio Oduber, y particularmente e sindicato ABV segun presidente Gina Maduro na Noticiacla.com. Manera ta conoci, pa diamars, directiva di hospital lo mester a scohe entre tres candidato, esun pa asumi e funcion di director interino te ora e director mes wordo scohi. 

NoticiaCla.com a compronde di Maduro cu nan a papia cu Hunta di Supervision y cu nan a duna nan ‘conseho’ y ‘sosten’ pa Cillie haya e posicion aki’ pasobra ‘e ta e candidato mas fuerte’. Segun Maduro, e trayecto di Cillie ta dune e motibo pa lidera hospital por lo pronto, pendiente e nombracion di un director di hospital definitivo. NoticiaCla.com a compronde cu un director general lo por wordo nombra pa comienso di otro aña (probablemente januari of februari 2015). Cillie tin 30 aña trahando na Hospital Horacio Oduber, ta dirigi riba varios departamento y ta mes momento ex hefe di varios di e departamentonan aki. Ademas e ta ex presidente di e sindicato ABV tambe. Pues segun Maduro, Cillie ta e ‘front runner’pa e funcion.

NoticiaCla.com tin di fuentenan hopi halto tambe, cu actual minister di husticia Arthur Dowers ta keda un candidato clave y cu ta goza di sosten di esnan cu ta den poder pa tuma e desicion aki. Palabranan manera 'e ta e candidato perfecto' a cay recientemente. Dowers, contrario na e prome biaha cu a aserke algun anja pasa, a bisa e biaha aki cu si e wordo aserca, y cu tin un proposicion serio y atractivo, e lo considera esaki seriamente. Mientrastanto e ta haci su trabou di minister pa cual e la wordo pidi pa haci. Si dado caso esaki materialisa, Dowers lo por haya e posicion pa comienso di fin di otro anja, y lo mester bin cambio di minister den e gabinete Mike Eman II. Pa loke ta e posibilidad di reemplazo pa minister Dowers, tin mencion di e.o. parlamentario Desiree Croes.