Posibel hotel na San Nicolas ta ‘all inclusive’

ORANJESTAD – E proximo proyecto hotelero cu tin cu bin San Nicolas, esta di e desaroyadornan di e concepto Bahia Principe, lo ta uno ‘all inclusive’. Minister di Turismo Otmar Oduber a confirma esaki na NoticiaCla.com diamars atardi. Segun e mandatario, berdad cu no ta posibel pa tin mas hotelnan ‘all inclusive’ riba e hotel strip na Palm Beach y becindario, pero no San Nicolas. “(Pa) pariba nunca a bisa cu (nos) no kier all in” Oduber a sigura NoticiaCla.com.

Despues cu e mandatario cu su colega de Meza a bishita e isla caribense dominicano den fin di siman cu a pasa, a bin e informacion cu nan tin intencion di convence e desaroyadornan/doño di e cadena aki pa bin establece un hotel di 5 strea cu 600 camber na Aruba. E grupo aki, presidi pa grupo Pinjero, ta un di e companianan mas grandi den e sector turistico Spaño y tin 40 aña di experencia den turismo. Pero mas interesante ta cu nan ta uza e concepto integra di ‘all inclusive’, e fundador y presidente Pablo Pinjero a lidera e compania pa su exito actual.

Esaki ta nifica cu si nan bin Aruba, lo no ta straño cu esaki lo mester ta cu e mesun concepto tambe. Un pregunta riba esaki na e mandatario si esey ta nifica cu San Nicolas e ora lo haya su hotel ‘all inclusive’, e mandatario a contesta “Corecto”. Pero mes momento e la mustra cu esaki no ta ‘nada nobo’.”Nieuwmeyer su proyectonan pa pariba tambe tabata All inclusive” e mandatario a sigui bisa. De hecho, e la recorda cu tur e proyectonan di Divi ta All in. No ta conoci con lihe e proyecto aki lo mester bin Aruba y kico tur mas lo bin cune y cua condiciona mas. Loke si e mandatario a confirma ta cu e ‘all inclusive moratorium’ no ta conta pa San Nicolas. E foto ta uno di un propiedad na Punta Cana, republica dominicana..