Grupo Chines ta firma MoU pa Aruba haya servicio di ‘Air-Bus’

ORANJESTAD/BEIJING – Aruba ta bay conoce un tipo di ‘Air-Bus’ aki 5 luna. E grupo financiero Chines Takama Investment Group a firma un MoU diabierna atardi cu un grupo local di inversionista di Aruba na Beijing pa asina formaliza nan intencion. E plan ta pa bin cu un coneccion areo entre e tres islanan ABC, estilo di bus, pero via avion. “Esaki ta e miho concepto, despues cu a nota cu otro aerolineanan ta fracasando den region” señor Ng Seng Hua, CEO di Takama Investment Group a splica NoticiaCla.com via un combersacion via Skype. E operacion lo ta mescos cu un bus, sin pasashi, sin reservacion, pero simplemente a base ‘cash-at-the-counter’ concept. Si tur cos materialisa, ta premira cu pa 1 di November mas tarda, por efectua e prome buelo entre e islanan. Lo uza un flota di 9 avion tipo Dash 8, cu lo bula cada 2 ora entre e islanan.

CONCEPTO ‘CASH-AT-THE-COUNTER’

E concepto nobo ‘cash-at-the-counter’ ta uno unda cu un cliente ta simplemente yega counter, paga cash, haya un ticket y subi avion, mescos cu e ta subi un bus. E no ta haci reservacion, sino ta yega y paga y bay. E servicio aki a duna resultado den e region chines unda cu tin hopi trafico entre varios pueblo chines. “E concepto di haci reservacion delanta, busca buelo etc ta anticua caba” Seng Hua a bisa. “Un biahero mester por tin escogencia di bay y bin bek manera cu servicionan di bus ta ofrece. Y e servicio entre e islanan ta sclama pa algo asina” Cham a continua bisando. E nomber di e Air-Bus ainda no ta conoci, pero ta deliberando riba algun nomber. Entre nan ta circulando AruAirBus, y AirBusAruba como opcion. A registra ambos nomber caba pa tin algo sigur ora cu ta asina leu. E Air-Bus concept aki lo genera trabou pa por lo menos 90 persona, incluyendo tripulacion y personal di tera (ground handlers). E concepto pues ta simple, barata y lihe. Asina un comerciante gusta biaha y mester por biaha” Seng Hua a continua bisando.

E FLOTA

E flota di avion ta consisti di 9 Bombardier Dash 8 di eSeries 100 cu ta carga 39 pasahero. Nan ta avionan di aña 2005, pues relativamente nobo den terminologia di aviacion. E Dash 8 ta hopi mas barata pa opera y pa mantene debi na e hecho cu e tin solamente 2 motor. Ademas e Dash 8 tin e gasto mas abou pa miya pa pasahero, de hecho cu cualkier avion regional di su estilo. Ademas e ta facil pa opera na aeropuertonan chikito

FRACASO DI CONCEPTO DI AEROLIÑA REGULAR

Aruba ( y Corsou) ta pasando den su pio momentonan di aviacion, unda cu varios aerolinea a cay den otro, bati bancarota of simplemente no funciona. Un grupo di inversionista local cu a prefera di no ta den ‘spotlight’ ainda, a dicidi di uni forza y topa cu e concorcio Chines, via un contacto mutuo. Varios di e inversionistanan ta conoci den mundo local di aviacion, y otronan tin companianan offshore y simplemente tin interes comercial di Aruba na pecho. “Nos no por sigui sufri comercialmente pa motibo di coneccion aereo pesimo entre e islanan” e contacto a splica e portal aki. “Cu e deal aki, nos ta premira cu por sera e buraco aki, cu sigur pa comerciantenan lo ta un alivio grandi”. A priminti cu dentro di dos siman lo bin afo den un conferencia pa splica e ‘in’s and outs’ di e compania