Aeroliña local riscando su operacion trahando sin hende clave

ORANJESTAD – E aerolinea local Aruba Airlines lo tin problema serio cu su postholders (posicionnan clave necesario pa por opera un aerolinea). Asina NoticiaCla.com por a compronde di fuentenan cerca di e operacion di e aerolinea. E portal aki tin den su poder un documento cu ta corespondencia entre e aerolinea y Director di DCA (Directie Luchtvaart Aruba) Edwin Kelly. E carta di DCA cu ta duna e compania 15 dia pa yena vacatura di un di su postholders (posicion clave di e compania). Ademas tin informacion cu por lo menos 3 otro posicion clave ta habri. E esencia ta cu sin e posicionnan clave aki, e aerolinea no por opera, mester wordo geground y posiblemente por perde su licensia.

POSICIONAN CU FALTA

E aerolinea falta e.o. un safety manager, Director of flight operations, director of training, y un compliance monitoring manager. Varios di e posicionnan aki ta wordo busca aworaki pa medio di avisonan den corant. Tambe tin informacion cu ta purbando di reemplasa hendenan local cu hendenan di afo (Venezolanonan) manera cu e portal aki a raporta recientemente caba. Den un caso, (e carta di DCA), e director ta hala atencion di e aerolinea, pa cu e prestacion di e postholder en cuestion. For di ‘falta di maneho’, te na falta di conocemento apropia di materia cardinal di aviacion’, te na falsificacion di documentacion, DCA no por a sigui cu e persona aki y a revoca su permiso di postholder pa e aerolinea. “Bo ta urgentemente wordo pidi pa busca un postholder adecua dentro di 15 dia di fecha aki (e carta tabata fecha 24 di maart 2017).

CHENS PA PERDE CATEGORIA

Mas informacion cu tin ta cu, mirando cu e aerolinea ta bula pa Merca, tur su documentonan mester ta na ordo sino Merca no ta autorisa e pa drenta su teritorio. Si e personal no ta cualifica, Merca por para esaki y de hecho, informa FAA y na su turno e instancia lo por mete pa baha categoria di nos aeropuerto pa categoria 2 (aworaki e ta categoria 1), cu ta mescos cu Corsou cu ta dificulta su operacion bastante pa aerolineanan local cu kier biaha pa Merca. Pues e situacion den e aerolinea, ta bastante serio for di informacion cu e portal aki tin. Intento pa haya reaccion cu directie luchtvaart no tabata exitoso ainda riba e topico aki.