Corte a sentencia polis Bremo na 4 aña di prizon pa violacion

ORANJESTAD – Corte a sentencia polis Bremo na 4 aña di prison awe mainta, cu ta mas halto cu fiscal a pidi. Corte a haya cu e polis a abusa di su posicion como polis. Ela bay den uniform pidi e dama paspoort y a bis'e pa bay warda, pasobra e sospecha di ta ilegal. En bes di bay warda di Polis, a hib'e na un tereno na Ponton y tene relacion sexual cu ne. Hues ta haya cu door di e acto aki B. atacha e integridad di e dama y tambe a daña e imagen di Polis. E actitud di Bremo cu e dama ta un prostituta ta haci cu Bremo no ta reconoce su malo. Hues a tum'e na malo pa esey. Door di ta prostituta e dama tabatin miedo pa haci denuncia pa no tin problema. Hues a dicidi cu mester duna castigo mas pisa y como tal a conden’e na 4 aña di prizon mientras cu Fiscal a exigi 3 aña y 6 luna di prizon.