Minister Paul Croes:’Nos lo surpasa e reto aki tambe’

ORANJESTAD – “Un situacion hopi dificil pa mi famia y mi persona”. Esey tabata e prome mensahe cu minister Paul Croes a duna, un dia despues cu oficialmente ela bira un sospechoso den caso di soborno, labamento di placa y malversacion di fondo ricibi di permisonan. “Mi tin confiansa den nos sistema hudicial y cu un trabou obhetivo ta wordo haci”, e mandatario ta sigui bisa. “ Pa no stroba e investigacion andando e mihor opcion ta pa no duna ningun declaracion adicional na e momentonan aki”. E mandatario ta sigura cu e tin tur confiansa cu cos lo bay bon p'e den e caso fastioso aki. “Mi kier enfatisa cu nos lo surpasa e reto aki tambe y alaves gradici tur esnan cu na un of otro forma a duna nos sosten den e momentonan aki.” Croes a finalisa bisando den un declaracion via su abogado di bufete HBN Law, Eline Lotter Homan. 

TRAHANDO RIBA SU CASO

E minister no ta trahando, pero ta den contacto cu su abogado y ta na cas. For di despues cu e caso a bira conoci, e mandatario a opta pa no traha, aunke no ta conoci si ela dicidi di retira temporalmente di su funcion como minister, of ta simplemente tumando algun dia pa informa su mes di tur loke ta pasando. Di parti di gobierno, a mustra cu ta dun'e su espacio pa e por atende cu su asunto.