MEP: Ta duna minister Paul Croes 48 ora pa entrega su retiro

ORANJESTAD - MEP ta duna minister Paul Croes 48 ora pa entrega su retiro. Di otro forma partido MEP lo yama un reunion publico pa presenta un mocion di desconfiansa contra dje. Asina parlamentario Dangui Oduber di MEP a confirma na NoticiaCla.com. “E carta cu e peticion pa e reunion t'ey, pero esey ta warda e dianan pasa. Segun Oduber, “Awor por wak ken ta para pa bon gobernacion, kende ta para pa integridad y kende ta para pa bagamunderia”. E parlamentario mes momento durante un declaracion den e noticiero NoticiaCla Merdia na Power FM a declara cu e no ta sorprendi cu e accion di ayera, pero si ta sorprendi cu no a haci mescos cu minister Benny Sevinger. Ayera e mandatario di asuntonan social a bira sospechoso den caso di fraude, labamento di placa y malversacion di fondo ricibi di pago pa permiso di trabou. E no ta deteni, pero OM no ta descarta detencion di tur e sospechosonan, incluyendo Croes pa nan actonan pa cual nan ta wordo sospecha di dje.