Huiszoekingnan relaciona cu caso penal contra minister ta cla

ORANJESTAD - E huiszoekingnan awe den e diferente localidadnan (casnan, empresanan y un fundacion) den e investigacion penal contra Minister di Asuntonan Social, Hubentud y Labor, y contra otro sospechosonan, ta cla. Asina OM a raporta atardi pa medio di un comunicado. Durante e huiszoekingnan a wordo tuma den beslag un gran cantidad di administracion y gegevensdragers.

INVESTIGACION PENAL FINANCIERO

Den cuadro di e investigacion penal, a start tambe cu un Investigacion Financiero Penal contra dos di e sospechosonan, caminda a pidi informacion financiero cerca varios institucion bancario. No ta specifica si cua sospechoso ta papia di dje, ni si ta envolvi e minister mes.

DETENE MUHER NA CAS DI CROES

Durante e huiszoeking cerca Minister di Labor a topa alavez cu un muher, cu tabata traha den cas di e Minister como maid sin cu e tabatin permiso pa esaki a base di su verblijfstitel actual. El a wordo hiba pa Warda Nos Costa y ta actualmente wordo scucha.

ANALISA DATO TUMA DEN BESLAG

Den e periodo venidero e team investigativo lo dedica su mes vooral na analisa loke a wordo tuma den beslag y na sigui scucha e sospechosonan y testigonan. Relaciona cu esaki, no ta exclui detencionnan.

Si bin desaroyonan especial den e investigacion, Ministerio Publico lo comunica via un conferencia di prensa manera awemainta, of via relatonan di prensa