Un aña pasa Paul Croes a desmenti rumornan rond di su persona

ORANJESTAD – Loke mas of menos un aña (y mei) tabata zona como rumor, awe a resulta di ta mas serio cu a kere. Si un aña pasa, - Prome minister Eman a confirma durante conferencia di prensa awe merdia - , colega minister Paul Croes a desmenti rumor di su envolvimento den supuesto practicanan ilicito, awe ta resulta e mesun minister ta wordo sospecha formalmente di malversacion y soborno. Y e raportahe di e corant Hulandes Telegraaf ta haya mas bida awe. E cargonan cu ta sospecha Croes di dje, ta netamente loke e corant a raporta un aña y mei pasa caba. Awor ta keda na OM pa proba e loke Croes ta wordo sospecha di dje y wak si enberdad tin algo di berdad tras di e sospecho. 

RAPORTAHE DI TELEGRAAF

Un aña y mei pasa caba, e corant Hulandes Telegraaf a raporta ‘supuesto iregularidad’caba riba e gobernacion aki. Informacion cu rapidamente e gabinete a desmenti. Entre e alegacionan den e articulo grandi den e corant Hulandes, tabata figura tambe un parti riba minister Paul Croes. E tempo ey, e corant a skibi e.o. di acusacionnan den direccion di Croes, unda cu 'e lo a extorciona stranheronan en busca di trabou'. Testigonan a bisa e corant cu coordinadornan di e mandatario lo tabata pidi 1000 dollar. ‘Pa esnan cu tabata paga, lo a agilisa e trabounan di permiso’ e corant a raporta e tempo ey. " Croes mes lo tabata procesa permiso di trabou pa e trahadonan” e corant a sigui bisa.

GOBIERNO NA ALTURA DI RUMORNAN CABA

Eman a confirma awe cu gobierno tabata na altura mas cu un aña pasa, cu tabatin rumornan envolviendo colega minister Paul Croes den e irregularidadnan. “Mas cu un aña pasa tabatin diferente rumornan, acusacionnan y mas cu un occasion tambe e minister en cuestion (Paul Croes) a splica cu no tin nada den e caso aki” Eman a bisa awe mainta. A tuma su palabra y a laga e asunto cay. Awe e gobierno ta sinta cu e situacion fastioso, cu tin cu wak con esaki lo afecta e gabinete.