Caso contra minister Paul Croes algo sumamente penoso

ORANJESTAD – “E ta un dia cu a conmove nos tur”. Asina prome minister Mike Eman a reacciona riba e noticia relaciona cu e sospecho cu tin riba colega minister Paul Croes di actonan corupto. “Nos ta considera algo asina como algo sumamente penoso. Penoso pa e persona, penoso pa gobernacion, penoso pa Aruba” Eman a sigui bisa. E mandatario a sigura cu tipo di investigacionnan manera a tuma lugar riba colega Croes sigur ta doloroso.” Pero cu nan ta tuma lugar den forma independiente. “Y cu gobernacion ta respeta tambe e independencia di e autoridad cu ta encarga cu e tipo di investigacion asina”.

COMIENSO DI INVESTIGACION

E mandatario a confirma cu e mes a keda notifica mainta tempran 6’or pa colega minister di husticia Arthur Dowers cu a yame y relata cu PG van Dam a informa di un huiszoeking na cas di colega minister Paul Croes. A compronde cu e investigacion a bin a base di kehonan cu a wordo duna, aunke detayes no tabata conoci completamente ainda. “E ta algo cu ta pone nos para keto un rato y pensa riba e stabilidad den nos pais” Eman a sigui bisa.

POSICION DI GOBIERNO

Eman ta considera poco prematuro pa stipula posicion di gobierno. “Nos mester duna husticia tur e espacio pa cana y e minister tambe su espacio pa den e dianan aki por evalua e embergadura di e keho di e situacion cu tin su dilanti” Eman a cuminsa na bisa. El a admiti cu e noticianan aki ta hopi nobo y gobierno tin cu analisa esaki, ofreciendo solidaridad na colega Croes di un banda, pero otro banda teniendo e respet pa gobernacion di pais Aruba y e independencia di nos sistema legal.

PAUL CROES TA KEDA MINISTER?

Segun Eman, Croes ta bayendo cerca su abogado pa haya claridad y inventariza e situacion. A priminti cu gobierno ta habri su portanan pa sigura cu tur investigacion por sigui su curso, hasta ora cu gobernantenan mes ta forma parti di e investigacion. Riba pregunta di NoticiaCla.com si Croes mester pone su posicion na disposicion pa investigacion por tuma su curso y wordo reemplaza cu otro colega, Eman a splica cu esaki ta depende di e siguiente oranan. Por compronde cu ora cu tin mas informacion, e ora e decision lo cay di kico mester cai. Sea ta Paul Croes ta tuma decision (p.e retira pa por sigui cu investigacion) of gobierno ta tuma decision di reemplaza. Mester tin tur informacion prome segun Eman a sigui splica.

CON ESAKI TA AFECTA CAMPAÑA ELECTORAL

E noticia aki no ta algo cu un partido cu tin siguranza cu e ta bon para pa e proximo eleccion, kier haya. Y e premier ta confirma esaki tambe. “E no ta un situacion cu bo ta spera y desea, ningun momento y sigur no den un campaña electoral” Eman a cuminsa na bisa. El a bisa tambe cu esey sinembargo no ta e prome cos cu ta bin na mente awor. “Na mente ta bin un politico prometedor hoben cu un carera bunita, si el a drenta politica. Awe e ta den un situacion asina” Eman a bisa di e situacion cu colega minister Croes ta haya su mes aden. Segun Eman e forma con tur hende ta doli pa e situacion, ta mas importante awor cu un eleccion. “Eleccion ta bin, eleccion ta bay. Tin biaha nos ta gana, tin biaha nos ta perde. Pero ta hoe wij blijven staan in de maatschappij, ta esencial” Eman a bisa, cu ta mas den centro di e momento aki. Cu tin un proceso electoral, ta hacie mas interesante pa e debate politico, pero e aspecto humano ta e temanan mas esencial, cu e proceso electoral, segun Eman a bisa. SCUCHA E CONFERENCIA COMPLETO AKI