Minister Paul Croes sospecha di malversacion y soborno

ORANJESTAD – Minister Paul Croes (Labor y Asuntonan Social y di Hubentud) hunto cu algun di su trahadornan ta sospechoso di corupcion y malversacion di fondo. Fiscal mayor Erick Olthof diamars mainta a confronta prensa cu e noticia, cu e mandatario aki, ta wordo sospecha di a acepta regalo, promesa y of servicio relaciona cu e mercado laboral, conduciendo na e hecho cu stranheronan por a haya permiso di trabou.

CARGONAN Y SOSPECHO CONTRA MINISTER

“ Durante e investigacion aki, a bin sali na cla e sospecho cu e minister aki a haci su mes culpabel na malversacion, y duna un persona illegal empleo. Tambe ta sospecha e minister di, hunto cu otro personanan, a haci su mes culpabel di labamento di placa procedente di soborno” Olthof a sigui bisa. E sospecho ta existi segun Olthof cu e corupcion ta consisti di e peticion of ricibimento di soborno, a cambio di trabou.

E ENTRADANAN HUDICIAL

Como parti di e investigacion awe marduga, a haci entrada hudicial na 13 cas y negoshi y fundacion, bou di guia di dos huez comisario. Aki personal di landsrecherche, RST, KPA FIOT y FIOD, marechaussee aki tabata envolvi. Nan a conduci na tumamento den beslag di material administrativo y varios otro informacion. Ademas a dicidi cu ‘ainda’ no ta haci detencion di e sospechosonan. Pero no ta descarta cu den e proximo ora of dia, esaki lo por sosode.

UNICO MINISTER SOSPECHA

Riba pregunta di NoticiaCla.com, Olthof a sigura cu no tin ningun otro minister cu ta un sospechoso. Tambe a mustra cu e indicacion pa e investigacion penal, a origina a base di mensahe riba Facebook, pero tambe declaracion di testigonan. A haci un investigacion di hechos, cu finalmente a conduci na un investigacion penal. E minister ainda ta liber, pero no ta conoci kico su limitacionnan ta den su funcion como minister. Scucha e conferencia COMPLETO AKI.