MEP ta entrega concepto di ley pa cambia kiesverordening

ORANJESTAD – Partido MEP ta entrega e concepto pa un kiesverordening nobo diamars na Parlamento. Si e cambio aki pasa den Parlamento, esaki ta nifica cu un miembro di Parlamento lo wordo escogi basa riba e cantidad di voto cu e ricibi durante eleccion, y no a base di numeracion/secuencia mas manera ta e caso actualmente. E intencion ta pa haci esaki caba pa e proximo eleccion. E persona cu ta presenta e ley aki ta e hoben politico Dangui Oduber. “Como politico bo mester bisa loke bo ta bai haci y haci loke bo ta bisa” Oduber a bisa. Tres luna pasa ela anuncia cu e ta bay haci esaki y awor e ley ta cla.

E SISTEMA BIEU

Segun Oduber, pa decadanan largo e kiesverordening no a wordo cambia y adapta. Y segun e parlamentario a yega e momento promer cu eleccion 2017 pa esaki wordo cambia. “Como politico nos mester duna oido na deseo di pueblo y e pueblo ta anhela cambionan di e kiesverordening” . Na e momentonan aki un representante di pueblo ta wordo escogi por medio di voorkeurstemmen of por medio di su number riba lista politico. “E ley aki no ta uno husto y tampoco ta refleha deseo di pueblo den e cas di pueblo. Tin hopi politico ta haya confiansa y sosten di pueblo, pero finalmente no ta drenta parlamento pa motibo di e ley y e sistema cu nunca a wordo cambia” Oduber a bisa. Como ehempel, Oduber ta mustra cu den e constelacion actual di parlamento tin parlamentarionan cu a haya 47 voto y den e mesun partido tin otro cu a figura mas patras riba e lista y a logra haya 427 voto cu ta casi 10 biaha mas hopi voto cu esun cu a drenta parlamento. E no ta considera esaki husto y tampoco representativo pa deseo di e pueblo aki. “Un miembro di Parlamento di Aruba mester ta un persona cu ta representa e deseo di pueblo durante eleccion. E cambio di e kiesverordening ta algo cu mester wordo haci pa e por ta representativo pa deseo di pueblo. Oduber ta kere cu e por conta cu sosten total di Parlamento. “Mi no ta kere cu por tin un politico of un miembro di parlamento cu por ta contra deseo di pueblo y contra e cambionan aki."

CAMBIO PROME CU ELECCION 2017

Segun Oduber, e cambionan aki mester bin na vigor promer cu eleccion 2017. ”Y mi ta spera cu e reunion publico aki wordo yama mas pronto cu ta posibel pa trata e cambionan aki pa yega na un votacion pa pueblo por husga kende ta para pa cambio, kende ta para pa progreso, kende ta para pa mehoracion di democracia y kendenan ta keda mara na e manera tradicional y anticua” Oduber ta finalisa bisando.

CAMBIO DI PARTIDO PA MOTIBO DI VOTO

Siman pasa ainda partido AVP a perde un miembro debi cu e.o. e situacion cu a surgi despues di eleccion anterior a pone cu e persona, aunke cu mucho mas voto cu algun di su coleganan, mester a keda pafo di parlamento. Awor ela tuma decision pa bula afo y ela dicidi di sostene otro partido.