OM: Afpakteam a actua bon recientemente cu e.o. captura di placa

ORANJESTAD – Ministerio Publico ta para ariba cu e loke a sosode recientemente, unda cu Afpak team a gara un cantidad di placa y detene hende, tabata corecto. Esaki contrario na declaracion di un miembro di partido MEP, cu a declara cu e caso en cuestion tabata un fracaso. Asina e vocero di OM Ann Angela a sigura NoticiaCla.com dialuna. E miembro di partido MEP esta Karel Maduro a declara den un articulo, cu e accion tabata incorecto, cu a laga e capitan deteni bay y a debolbe e doño su placa. “E sospecho ta keda para, y e placa ta keda den beslag” Angela a sigura e portal aki, desmintiendo e informacion di Maduro. Pa loke ta e detencion di e capitan, esaki a keda vigente te cu a deporta e capitan bek pa su pais. “Tur cos ta keda pa nos manera poni den e persbericht di siman pasa” Angela a sigui bisa.

ARTICULO MADURO

Segun Maduro, e trabou di e afpakteam a bay sin bon investigacion y cu despues cu e team a haci nan trabou di e.o. detencion y coy e placa, nan mester a laga e capitan den libertad y ‘debolbe e capitan full e suma di placa’. Ta papia di ‘un berguensa total pa Aruba’, y con ‘hende sin conocemento di comercio na Aruba ta core tuma decision manera ta Jean Claude van Damme e ta’. Basa riba esaki a acerca ministerio publico pa nan reaccion.