Posponemento caso Mitch Henriquez, devastador pa famia

ROTTERDAM – “E noticia aki tabata devastador pa nos”. Asina ruman mayo di Mitch Henriquez (dfm) esta Lila Henriquez a bisa NoticiaCla.com awe mainta for di Rotterdam. E ta reacciona riba e noticia cu nan a bin tende diabierna, cu corte ta pospone e tratamento di e caso envolviendo su ruman. Corte a dicidi pa pospone e caso basa riba un rapport entrega siman pasa cu por cambia e rumbo di e caso.

ORA CU A TENDE E NOTICIA

“Nos a tende esaki diabierna anochi na Hulanda entre 7 pa 8 or” Henriquez ta sigui bisa. “E dia aki tabata e dia cu nos tabatin e kortgeding tambe. E ta referi na e caso sumario di dia 24 maart cu e famia a entama pa e nomber y informacion encuanto e polisnan pa asina aki e abogado di famia (Richard Korver) por a haci su investigacion. “Nos a haya yamada di nos abogado (Korver) y ela duna nos e mal noticia aki. Wel manera bo por imagina nos a keda speechless. Ela informa nos y nos a keda perplex cu e noticia ki” Henriquez a continua bisando.

NOTICIA DEVASTADOR

“E dia aki tabata, ya, un dia intenso y e noticia aki tabata devastador pa nos moral como tambe pa nos preparacion emotional pa cu e caso mes cu tabata den nos mente na april”. Henriquez ta referi na e caso cu mester a tuma lugar dia 6 di april proximo. “Manera ta awo, ta keda solamente dia 6 april unda cu lo trata kico lo bay pasa exactamente. Lo tin caminda pa cana nos ta pensa, pero cu esaki lo ta costoso, cual eigenlijk ta dificil pa nos como famia”. E famia lo sinta cu abogado e siman aki pa e splica nan kico nan lo por haci.