Caso Mitch Henriquez posponi debi na rapport nobo

DEN HAAG – E caso contra polisnan sospecha pa ta responsabel pa morto di Arubiano Mitch Henriquez na 2015, no ta sigui awor mas otro siman. Corte na Den Haag a dicidi pa para e tratamento di e caso (e contenido) te proximo aviso. Asina a keda dicidi net prome cu weekend. Prensa Hulandes ta raporta esaki y ta mustra entre otro cu e abogado di e famia di Henriquez no ta contento, y cu e famia ta destrosa mirando cu nan a bin Hulanda pornada pa e caso. “Mitch Henriquez posiblemente no a muri door di un ‘nekklem’, sino mas sigur di un paro cardiaco” un rapport presenta e siman cu a pasa, ta bisa.

ABOGADONAN DI POLISNAN

E abogadonan di e dos agentenan sospechoso a presenta diabierna ultimo, dos siman prome cu e fecha di tratamento di e caso, un rapport forensico na corte. Aki e posibel rason di morto di Henriquez ta stipula. E motibo di morto di Henriquez ta hopi importante pa e caso, y como tal, a base di e rapport, mester haci mas investigacion. Un patologo y un otro medico forensico lo mester haya oportunidad pa duna comentario por escrito. Y no tin tempo den e periodo cortico prome cu e caso tuma lugar. Ademas, e mediconan aki no ta disponibel pa durante e tratamento, aparece como testigo, cu tambe ta necesario segun prensa Hulandes.

CASO MESTER A TUMA LUGAR OTRO SIMAN

E caso mester a tuma lugar dia 6 di april y mester a dura 5 dia largo. Lo tin un presentacion si, pero esaki lo bay estilo ‘pro deo’ unda cu lo trata exclusivamente e topico aki. No ta conoci ki dia e caso lo tuma lugar awor.