DESPA controlando tur carni procedente di Brazil despues di fraude cu carni contamina!

ORANJESTAD - Desde siman pasa mundo henter ta riba un alerta, despues cu autoridadnan Brazilero a descubri cu algun compania tabata uza carni daña, paketa nan di nobo y bolbe bendenan comosifuera nan ta fresco y nobo. Mescos cu "Nederlandse Voedsel- en Warenautoriteit" di Hulanda, aki na Aruba tambe Servicio Veterinario di Departamento di Salud Publico Aruba (DVG) tambe a activa mesora y ta aplica 100% control visibel riba tur carni di e pais Latino Americano.

Mester menciona cu na Aruba mayoria carni ta procedente di Argentina y for di Merca, pero un parti tambe ta bin di Brazil. Pa evita cu ta crea panico innecesario, ta bon pa aclaria cu ta 4 compania ta wordo sospecha di e practica aki. Pues ta cuestion di verifica di unda e carni ta bin, di cua compania, di cua carniceria y verifica e number di e carga. Ora un di e informacionnan aki no ta cuadra, ta prohibi entrada di e carni na Aruba. Ya caba a prohibi un container cu ta den ruta pa nos isla, cu no lo permiti drenta mercado.

Departamento di Salud Publico Aruba ta den contacto estrecho cu nan coleganan di Hulanda pa asina garantisa cu aki tambe ta aplica e mesun reglanan cu Hulanda y cu ta aplicando den paisnan miembro di Union Europeo. E reglanan ta mas estricto, pero ta pa garantisa cu solamente carni di calidad ta yega e paisnan aki.