Critica contra departamento Hulandes encarga cu inspeccion InselAir

SCHIPHOL – E mesun instancia Hulandes cu ta encarga cu inspeccion di e aerolinea InselAir Aruba y Insel Air International, esta e departamento di aviacion civil ILT (Inspectie Leefomgeving en Transport), ta bou di critica pisa e weekend aki. Un articulo den e corant Telegraaf ta relata riba fayonan serio tumando lugar den e area aki, citando te hasta expertonan riba e tereno aki. Ta papia cu e departamento aki a ‘perde strea di nort’, ‘falta di conocemento’ y ta ‘leu di realidad’.

PARA OPERACION INSEL AIR

E mesun ILT aki ta pues esun cu basa riba nan conseho, gobierno Hulandes a para tur nan personal di bula cu e aerolinea, y a convence gobierno di Aruba y Corsou pa no permiti avionnan aki ‘pa bula te proximo aviso’. Asina cu e raportahe di diasabra a sali, miembronan di InselAir Aruba a reacciona publicamente riba esaki, cuestionando e seriedad di e instancia aki.

KEHO RIBA ILT

Segun e raporta, ILT ‘a perde strea di nort’. Tambe nan a cremencha, tin mucho poco conocemento y e reglanan gubernamental ta leu di e realidad diario’. Ademas ta mustra cu ILT ta fayando na Schiphol (e aeropuerto mas grandi y principal di Hulanda) y aeropuertonan regional. “E supervision inadecua no ta beneficia e seguridad, segun critica di e companianan areo y e instancianan cu ta interesa riba e tereno aki. Vocero di KNVVL (Koninklijke Nederlandse Vereniging voor Luchtvaart) Ronald Schnitker ta bati alarma. “E comprension cu aerolineanan ta malo. Esey ta conta tanto pa e aviacion ‘grandi’ como esun 'recreativo’ e vocero ta bisa. E inspectornan ta ‘invisibel’ y ta traha numa sin ningun tipo di consulta. Varios piloto ta di acuerdo cu ne cu e inseguridad a aumenta. Ta haci mencion di un declaracion di un instructor cu kier keda anonimo, bisando cu na inspeccion, nan no tin ningun clase di conocemento mas di aviacion. “E incompetencia ta birando un hilaridad, pero ta trata mes momento tambe di purba di evita accidentenan fatal. Ultimo tempo cos ta fayando. E reglanan mester wordo mehora.'

DIRECTOR NOBO DI ILT

E director nobo di ILT Jacqueline Lamé ta bay drecha cos segun e articulo. E tambe ta di acuerdo cu inspeccion ta fayando, y cu segun un oficina externo, a traha un analisis di e puntonan fuerte debil. “Un reorganizacion ta na su lugar” e director ta wordo cita den e articulo di Telegraaf.