IMF ta sugeri pa gobierno di Aruba tuma mas medida

ORANJESTAD – Gobierno mester tuma mas medida pa por logra reduci e deficit di pais Aruba mas ainda. Asina e rapport preliminar di Fondo Monetario Internacional (IMF) e siman aki a laga sa. Manera ta custumber, cada 2 aña IMF ta bishita Aruba (ultimo bishita tabata na 2015) y ta haci nan ‘assessment’ di e situacion financiero economico. Nan tabata na Aruba e ultimo dos simannan cu a pasa y a informa su mes pa medio di combersacionnan cu politiconan, gremio y tur otro instancia necesario. Y for di esaki, nan a logra saca nan propio conclusion independiente preliminar. Un proceso normal despues di un bishita asina. Riba un termino no mucho leu, nan lo presenta nan rapport final di e bishita aki.

BLANCO DI SHOCK

Loke cu IMF ta señala tambe ta cu economia di Aruba ta sufri di e consecuencianan di e shock cu e falta di crecimento pa motibo di factornan externo ocasiona. IMF ta sugeri cu en bes di tin plannan ambicioso te 2018 pa crea un surplus den e presupuesto di gobierno, extende esakinan te por lo menos 2020 pa asina e por tin un miho efecto riba e loke mester wordo haci. Un otro advertencia cu IMF ta mustra riba dje ta e echo cu tin otro factornan di risico pa e economia cu ya caba ta bou di presion. Esey ta debi cu segun experiencia di IMF cada recesion economico ta wordo sigui door di crecemento economico structuralmente abou.

IMPUESTO INDIRECTO

Entre e puntonan resaltante, ta cu ta pidi pa aumenta e entradanan y haci esaki pa medio di e.o. impuesto indirecto. Tambe ta papia di independisa AZV for di gobierno. Ademas ta (bolbe) señala cu salario di e aparato gubernamental ta mucho halto y cu mester reduci esaki (atrobe). Reforma di e mercado laboral tambe mester ta un factor cu gobierno mester atende cune, pa asina por logra aumenta e productividad.

PUNTONAN POSITIVO

Segun IMF, tin mencion nan positivo tambe pa gobierno. Entre nan, e desaroyo den direccion di energia renovabel, cu ta e manera di futuro. Ademas esaki ta ofrece posibilidad riba desaroyo y diversificacion economico a termino largo.