D.O.W. ta acepta su fout cu snoeimento na Franse Pas

ORANJESTAD – “Nos a bay haci un trabou cu un bon meta, pero algo a bay robes” Asina director di DOW Marlon Croes a reacciona diabierna riba e hecho cu a corta e matanan na Franse Pas di tal forma cu ela kibra e ‘dak’ di mata bunita. E hecho aki a wordo severamente condena den comunidad durante dos dia caba. “Mi tin cu acepta cu algo a bay fout den nos organisacion, cu ela bay fout. Y nos tur ta desapunta. Mesun desapunta cu comunidad di Aruba ta” e director a sigui bisa.

CAMBIA PROCEDURA PA EVITA MESCOS DEN FUTURO

Mirando loke a pasa, mesora segun Croes a inicia dialogonan entre e coleganan di DOW pa wak kico a bay fout, dicon ela bay fout y kico por haci. “Nos a yega na e conclusion cu nos tin cu cambia e procedura di con tin cu traha ora cu bo ta den un zona sensitivo asina ki y mehora nos procesonan. Miho checks and balances pa preveni esaki di sosode den esaki” Croes a sigui bisa. Sigur segun e director, si mira cuanto cos a bay bon, pa esaki bay malo. E ta referi na e otro trabounan rond di e green corridor manera instalacion di e brug, y traha cu contratista y expertonan internacional pa proteha Spaans Lagoen su medio ambiente segun standard international. “Anto pa awor na Franse Pas nos haci algo cu echt no mester. Nos mester acepta cu nos a haci fout. A palabra cu nos hendenan caba” Croes a sigui bisa.

E TRABOUNAN

Tin diferente caminda cu ta cera en conexion cu e proyecto Green Corridor. Croes a splica tabe cu na comienso di siman a cera e crusada di ex Drive In na Kibaima. Un di e ruta di desvio di trafico ta esun cu ta pasa door di Franse Pass. DOW a ricibi hopi peticion pa snoei e matanan pa motibo cu esaki ta haci daño na nan vehiculo, Trucknan y busnan grandi ora di pasa e ruta aki. Durante snoeimento e proceso a bay malo y door di esaki a snoei dimas. “Nos ta pidi nos disculpa pa cu e susedido y lo traha riba e procedura pa esaki no sosode mas den futuro. DOW su meta principal ta pa conserva lo maximo posibel nos naturalesa conforme DOW su vision” Croes a bisa finalmente. Info ta entrevista di TeleAruba/Facebook y fotonan ta di Facebook.