De Meza: No por haci InselAir ningun promesa di ayudo awor

ORANJESTAD – Gobierno no tin parte ni arte den e situacion di InselAir Aruba y e compania ta uno priva. Asina minister di transporte Mike de Meza a informa trahadornan di e aerolinea cu a bishita diaranson pa ayudo. E trahadornan a pidi de Meza pa gobierno di Aruba duna nan un schenking di 1.5 miyon florin cu mester cubri salario di un dos luna.

SORPRENDI CU NO A BIN CU PLAN DI ACCION

E mandatario a haya straño cu e compania a laga e trahadornan bin, y no e compania mes bin cu un plan di rescate, cu ta algo cu por a combersa cu ne, kico e intencionnan ta di e compania y e doñonan di e compania. Pero a opta pa manda e trahadornan en bes. E unico promesa cu e mandatario a duna ta cu lo discuti e situacion cu coleganan minister, pero no spera un contesta den 24 pa 48 ora.

NO TIN GARANTIA PA AYUDO DI GOBIERNO

Mes momento de Meza a sigura e trahadornan cu e no ta un garantia cu gobierno lo yuda nan, y lo haci algo. “Gobierno mes tin su retonan pa añas caba, historica unda cu mester cubri gasto di su mesun operacion” de Meza a bisa, indicando cu no por bay yuda un compania priva (mas) financieramente. A repasa e historia cu gobierno tabatin den pasado cu Air Aruba y a bisa bon cla cu gobierno no ta participa den companianan priva, y sigur no den companianan priva di aerolinea. “Ta evaluando kico ta e oportunidadnan cu por haci pa e conectividad” e mandatario a bisa, mirando cu e situacion ey por bira uno fastioso.