Premier Eman a cuminsa bishita na Samoa

APIA, SAMOA – Premier Mike Eman a yega capital di un di e islanan di Samoa, esta Apia pa cuminsa dialuna cu e conferencia di Nacionan Unin riba islanan chikito den desaroyo. E la keda ricibi pa embahador hulandes na Nueva Zeelandia, Rob Zaagman Riba peticion di Minister Timmermans, Prome Minister di Aruba ta encabesa e delegacion di Reino Hulandes na e conferencia. Reino Hulandes tin pleno confianza den Prome Minister Mike Eman. “Ta p’esey mes e la wordo apunta pa representa Reino Hulandes sin ningun reserva,” e mandatario Hulandes lo a expresa durante encuentro entre e dos mandatarionan diahuebs ultimo.

Segun Timmermands e bishita di Eman ta nifica “un señal importante a pesar di e diferencianan cu tin entre e paisnan Aruba y Hulanda den e ultimo lunanan,”. E conferencia na Samoa ademas ta importante pa Reino Hulandes unda cu esaki ta buscando apoyo internacional pa asuntonan riba tereno di sostenibilidad, iniciativanan duradero y tambe innovacion. Ademas Reino Hulandes ta competiendo hunto cu Suecia y Italia pa un asiento den e Conseho di Siguridad di Nacionnan Uni cu ta e organo ehecutivo mas importante di e organisacion internacional aki.