Howell: Mi a retira di AVP pero no a join niun partido ainda

MABON – E candidato di partido AVP Alan Howell a dicidi di retira di e partido. Den un declaracion cortico ela admiti na NoticiaCla.com cu enberdad ela retira di partido y tambe como consehero di minister Mike de Meza. “Pero mi no a join ningun partido ainda” Howell a sigui bisa. Rumornan persistente ta bisa cu e lo uni cu e partido POR di Otmar Oduber, aunke esaki no por a keda confirma. Tambe tin informacion cu Howell no tabata contento cu e situacion den partido, sigur no cu su cantidad di voto cu ela haya den ultimo eleccion (420 voto), pero no a logra drenta parlamento pa motibo di e number cu e tabatin riba lista e tempo ey. E ta bira un otro candidato cu voto, cu e partido ta perde. Otronan cu a bandona e fila ta Otmar Oduber cu tabatin 4008 voto, y Marisol Lopez Tromp cu tabatin 1643. Otro candidatonan cu no ta bolbe ta Desiree de Sousa y Clarisca Velazquez. E ultimo dosnan aki a participa caba cu nan no ta bolbe riba lista.