Croes: A inicia investigacion pa sa con e caso di fraude por a pasa

ORANJESTAD – Di ora cu e noticia a bira conoci di e caso di e ex trahado di Setar cu a comete fraude, e compania a tuma tur paso cu un compania por tuma pa soluciona e caso mas lihe. Entre nan, contrata un compania renombra pa haci e investigacion forensico riba e caso na Merca. Asina director di e compania meymey di escandalo cu telefon celular Setar, esta Roland Croes a bisa diahuebs. Ta prome biaha cu e director a papia publicamente desde cu e noticia a plama dos dia pasa riba e corant Mericano Miami Herald. Segun Croes, a purba saca afo con algo asina por a sosode y pakico un trahado di nan a aparece riba e lista ‘popular’ conoci como Panama Papers.

PRACTICA DESCONOCI

E actonan di e persona no a tuma lugar den Setar, sino pafo di orario di trabou. Croes a sigura cu tur cos cu nan tabata cumpra tabata wordo paga y tabata cuadra. Pero e problema tabata e dealsnan traha pafo di e compania cu a pone cu e productonan tabata bin e compania. Esey no tabata conoci pa e compania. “Nos no tabatin un bista riba e suppliersnan”. Ora cu a mira e nomber di e trahado riba lista, a cuminsa.

ANALISA TUR FILES DI E PERSONA

A mustra cu a y ta investigando tur files di e persona di 12 aña largo. “Nos a yega riba 200 mil files cu ta wordo analisa y ta mira relacionan pa haya sa cua compania esaki ta y pa yega na final na un idea di kico por a pasa” Croes a bisa. Primordialmente pasobra ta cosnan cu no a pasa den Setar, pues pa trace esaki ta bira mas dificil. “E investigacion aki a bay asina leu cu a bisa cu awor tin suficiente informacion cu por a entama un caso na Merca, y tambe tin mas informacion pa bin cu ne Aruba y entrega esaki na polis y cana e caminda ey” Croes a bisa.