Esnan culpabel pa fraude, tin cu responsabilisa nan mes

ORANJESTAD – Esnan responsabel pa fraude tin cu para responsabel pa su acto. Asina minister Mike de Meza a declara den un conferencia di prensa diahuebs atardi. Segun e mandatario, SETAR y su director a actua corecto den e caso di e fraude recien publica, y ta goza di sosten di gobierno di Aruba. Ministernan de Meza y Richard Arends a bin dilanti den un conferencia di prensa, pa defende e director y e compania, y sigura cu nan a actua corecto for di momento cu a conoce e problema y no a haci nada malo. “Na momento cu esaki a tuma lugar mi na wordo informa door di director di Setar y e raad van commissaris di Setar, cu esaki ta e caso y cu nan ta cuminsa un investigacion” de Meza a bisa. Ta lamenta cu Opositornan ta haci politica cu ne, y ta sensasionalisa e informacionnan.

PROCESO PA CANA

A mustra cu no por duna tur informacion aunke cu esey lo ta un deseo, pero mester respeta e proceso di investigacion. Ta bay wak awo con ta bay recupera e dañonan material y cualkier otro cos. “Director di Setar a prueba di a cana e caminda corecto, y ta haciendo investigacion hopi profundo y costoso. Ta inaceptabel pa e tipo di practicanan aki tuma lugar” de Meza a sigui bisa. Lo duna informacion na momento cu por duna esaki, y e ta limita debi na e situacion y conseho huridico.

IMPLEMENTA CAMBIO DI PROCEDURA

A cuminsa implementa cambio di procedura na Setar pa evita cu cosnan asina sigui sosode. Tambe a splica cu e loke a sosode a tuma lugar pafo di Setar, cu a causa e problema. P'esey e casonan a cuminsa den exterior pa por trata e esaki corectamente. De Meza a sigura cu e caso lo bin Aruba tambe unda cu lo trata esaki via ministerio publico riba un nivel local.

COMPLIANCE RISK

Gobierno a dicidi cu lo bay haci un compliance risk review di tur compania estatal y tur e organisaciona sui generis, pa mira si e proceduranan ta esunnan mas optimal cu tin y si tin cu haci cambio, lo haci nan tambe, basa riba conseho di expertonan.

POR A PASA CU CUALKIER COMPANIA

E loke a sosode segun de Meza, no ta inusual y por a pasa cu cualkier compania, y ta pasa hopi biaha den paisnan desaroya manera Merca y Hulanda. E por a pasa den un pais menos grandi manera Aruba. ”Nos a trat'e cu e seriedad optimal y ta tratando di sigura cu tin e expertonan mas miho cu ta posibel pa na fin di dia nos soluciona e caso aki y wanta cada ken pa e dañonan cu nan a haci na e compania, responsabel pa nan actonan”.