Reuters: Escases serio di gasolin na Venezuela

CARACAS – Tin informacion cu gasolin ta cabando na Venezuela. For di e agencia di noticia Reuters, ta raporta cu Venezolanonan ta confronta cu escases serio di gasolin. Filanan largo pa gasolin ta un bista poco visto na un pais cu ta conoci pa tin gasolin na abundancia. Pero segun Reuters, diaranson tabata evidente cu e productor domestico principal tabatin problema cu distribucion di gasolin. No por cumpli cu e demanda y atraso den pago na proveedornan a pone cu tin escases di petroleo pa PDVSA. Ciudadanonan ta frustra. “Nos ta un pais cu ta produci petroleo. E cos aki ta patetico” ciudadano Jose Paredes a bisa.

TARDANSA DI PRODUCTO

Segun un di e hefenan na PDVSA Ysmel Serrano, tabatin problema pa distribui productonan internamente, cu a conduci na e escases den cuater di e 23 estadonan, pero cu e problema ‘lo wordo resolvi pronto’. Mientrastanto den e ciudad di Puerto Ordaz, soldatnan di guardia nacional ta purbando di mantene orden na e pompnan di gasolin cu si ta funcionando. Serrano a sigura cu PDVSA lo redobla e distribucion pa remedia e situacion y a pidi e pais pa keda calmo y no drenta panico riba ‘rumornan falso cu e pais tabata den chaos’.

INVENTARIO PA DOS DIA SOLAMENTE

Sinembargo, lider sindical Ivan Freites ta sigura cu refinerianan na Venezuela tin inventario pa solamente 2 dia, compara cu e standard di 15 dia. Tin 12 tankero ta wardando na e waf na PDVSA, pa por entrega un variedad di productonan refina petrolero.