Parlamentarionan a pidi reunion publico riba caso entama pa Setar N.V. na Merca

ORANJESTAD – Despues cu nan a tuma nota di e escandalo di compra y benta di telefon celular pa un (ex) trahado di Setar, y cu awor e compania ta entama caso na Merca riba e tema, parlamentarionan Andin Bikker y Marisol Lopez Tromp a pidi un reunion publico pa atende cu e asunto aki. Segun e parlamentarionan, gobierno ta haya dividendo di companianan estatal di Pais Aruba cual ingresonan ta incorpora den presupuesto di nos Pais. Si tin menos ganashi den un compania estatal pa cualkier motibo, esaki tin como consecuencia cu Pais Aruba ta haya menos entrada anual riba su presupuesto, of cu tin menos espacio pa rebaha prijsnan.

DEBER DI PARLAMENTO

Mirando awo cu a bin resulta cu tin un caso a wordo entama na Merca pa compania estatal Setar N.V. pa purba recupera sumanan astronomico cu a bay perdi pa mas cu 10 aña, ta deber di Parlamento pa pidi Gobierno y e ministernan politicamente responsabel splicacion riba e tema, segun e parlamentarionan menciona. “Sigur mirando cu Parlamento no a wordo informa door di Gobierno. Gobierno mester aclarea por ehempel desde ki tempo e tabata sa di tematica y dicon no a informa Parlamento y tambe referente e “checks and balances”, dus sistemanan di control cual obviamente mester wordo revisa pa evita cu algo asina por ripiti. Den luz di esaki Bikker y Lopez-Tromp a entrega e siman aki un peticion na Presidente di Parlamento pa yama un reunion publico pa e ministernan responsabel por bin duna splicacion na Parlamento riba e tema.