Pendiente resultado CFT, a entrega presupuesto 2015 na gobernador

ORANJESTAD – Mientras cu parlamento no ta ricibi e presupuesto segun ley di comptabilidad riba 1 di september, gobernador si a haya esaki ‘na tempo’. Tabata e mesun diabierna cu Minister di Finanzas Angel Bermudez a presenta e jaarrekening (cuenta anual) di 2013 na parlamento, e la presenta e presupuesto 2015 na gobernador. Un presupuesto cu a keda aproba anteriormente pa conseho di minister di Aruba. “Nos no a logra entrega e presupuesto na Staten pero nos a haci entrega na Sr. Gobernador, p’e despacha esaki pa Raad van Advies”, e mandatario a splica

Gobierno di Aruba ta en espera di e resultado di e investigacion di e secretariado di College Financieel Toezicht, cu ta tuma lugar dia 12 di september proximo. Unabes esaki keda entrega, gobierno por usa e informacion adkeri pa asina completa e presupuesto 2015 y sigui esaki pa cana su caminda normal. Entre esaki, mester manda esaki pa Raad van Advies y otro instancianan cu tin cu duna nan comentario prome. Segun e propio mandatario di finanza, tanten cu no keda cla cu 2014, no por completa esun di 2015. Pues mester considera 2015 apenas un ‘concepto’ di e presupuesto real.