Bruno Mars e exito di Curacao North Sea Jazz 2014

WILLEMSTAD – Dilanti un publico di (segun estimation inicial di organisadonan) 12.000 hende diabierna anochi, Bruno Mars mester a bira e highlight di e di 5 edicion di Curacao North Sea Jazz Festival. Por lo menos segun e creador di e festival pa Corsou, Gregory Elias. Y for di e reaccion di e publico diasabra anochi, Bruno Mars a mustra pakico e ta e ‘superstar’ di 2014. Cu pasonan cu a pone hopi compare cu Michael Jackson y Fred Astaire, Mars a deleita un y tur, grandi (y hopi chikito) pa bira asina e ‘artista di CNSJ’ pa 2014. Juan Luis Guerra, un veterano di e musica bachatero y merengue, no a decepciona aunke cu hopi a considere como un replica identico di su prome presentacion di 2011. Esun cu tabatin duda den su presentacion (rumor di problema vocal) , Chaka Khan a mustra cu ainda e tin aden y a deleita esnan presente cu su repertorio legendario. Otronan cu tambe a presenta, a sa di deleita nan respectivo audiencia y tampoco a defrauda ningun hende.

E di dos anochi tabata visiblemente mas yen (12.000 hende diasabra vs. 8.000 diabierna segun estimation preliminar) compara cu e anochi prome. “E line up y e gastonan halto tabatin hopi di haber cu esaki. Pero na tur, e organisadonan por mira bek riba 2 anochi exitoso, unda cu tur esnan presente, a sa di goza di dos anochi di caliber halto di tanto musica, como tur otro faceta cu a haci e festival uno di renombre mundial. Algun asunto a keda pendiente, manera e retraso di Smokey Robinson (20 minuut di retraso) y duda den presentacion di Chaka Khan inicialmente. Pero unabes riba escenario, a lubida tur esaki y a goza manera cu CNSJ so por haci.

Mesora despues, a cuminsa specula riba e siguiente edicion. Manera cu NoticiaCla.com a mustra caba recientemente di un entrevista cu Gregory Elias, nombernan manera Justin Timberlake, Shakira y Phil Collins ta riba e lista di deseo di e creador di e festival. Pero prome cu esey mester confirma si e festival di e aña aki a cumpli cu e criteria pa por tene un edicion # 6. Den e siman aki, NoticiaCla.com lo bin cu e criteria cu Elias ta atende pa tuma decision si ta continua cu e festival of no. NoticiaCla.com ta gradici esfuersonan di Curacao Tourism Board pa e invitacion pa por a cubri e festival aki.