Arubiano postula pa wordo nombra Vicepresidente Corte di Husticia Corsou y Boneiru

WILLEMSTAD - Diabierna 17 di maart 2017 Mr. Mauritsz de Kort a keda postula dor di Conseho di Minister di Reino pa bira vicepresidente di Corte Comun di Husticia di Corsou i Boneiro. Mr. De Kort ta susede mr. Eunice Saleh, cu a bira presidente di Corte na januari ultimo. E postulashon ta drenta na vigor 1 di april 2017.

De Kort a nace na 1973 na Aruba. El a bai VWO na Colegio Arubano i despues a sigui pa HEAO na Arnhem. Despues di a termina HEAO el a cuminsa studia lei na Universidat di Leiden. De Kort a termina esaki na 1999 i mes ora a sigui pa e master ‘postdoctoraal’ na Universidat di London.

Despues di su estudio De Kort a traha algun aña como abogado na Corsou, Aruba i Sint Maarten. Na 2007 el a cuminsa ku e estudio pa bira hues, esta Rechterlijke Ambtenaar in Opleiding (Raio). El a termina esaki na 2011. Di 2011 pa 2015 De Kort a traha como hues na Corsou. Despues el a translada pa Corte na Sint Maarten, caminda el a sigui ku su trabounan. Prome ku su traspaso pa Sint Maarten hues De Kort tabata encarga ku prensa na Corsou (Persrechter) i na Sint Maarten el a eherse e funcion aki tambe te ku 1 di mart 2017. Ku su nombramento hues De Kortta regresa Corsou pa drenta den e funcion di visepresidente.