Kelly: Aruba no kier avion bieu mas

ORANJESTAD – Directiva di Aviacion Aruba ta bisa cu ora di duna licencia di bula na compania di aviacion nobo nan lo bay tene mas cuenta tambe cu e edad di e flota. “Avion bieu no ta insigur mesora. Pero ta un tendencia pa cumpra avion bieu barata pa bay bula cu nan, cu tur reto di esaki”, director di Aviacion Aruba Edwin Kelly ta bisa.

MANTENCION

Mas y mas e ta mira compania di aviacion ta scoge pa avion bieu. “Esaki ta hopi barata ora bo cuminsa. Pero e avionnan ey mester di masha hopi mantencion y esaki kiermen gasto halto di mantencion. Avion nobo ta mas caro den cuminsamento, pero ta costa menos den mantencion. Ta importante pa studia esaki adelanta y asina garantisa cu cos lo keda bay bon.”

Na Merca, un di e paisnan cu e regulacion di mas severo den e parti aereo, tambe tin compania grandi ta bula cu avion di 25, 30 aña bieu, e director ta admiti. “Como directiva nos ta wak e cos aki si y si bira berdaderamente extremo nos lo actua.” Un di e avionnan MD di InselAir cu tin un promedio di 26 aña bieu. InselAir tambe ta bula cu avion bieu. E flota cu a tene abou na Aruba, tin un edad promedio di 26 aña. Anteriormente e experto Canades di avion Bryce Fisher, cu autoridad Curasoleño di aviacion CCAA a emplea, a bisa cu InselAir a pone su mes den huki, pasobra tur e avionnan tabata den necesidad di un mantencion grandi na e mesun momento. E compania di aviacion ta reconoce cu pa motibo di falta di placa nan no por a cumpra e piesanan na tempo, loke tabatin consecuencia pa e planificacion di e mantencion.

‘NO DIFERENCIA’

Fundado di InselAir Edward Heerenveen di otro banda ta haya cu ‘no ta haci un donder di diferencia’ sea bo scoge pa avion bieu of nobo. “Si mi tuma un avion bieu mi sa kico ta mi plan di mantencion tambe. E ora e mi sa cuanto esaki ta costa. A base di esaki mi ta traha un presupuesto. Si mi cumpra un avion nobo mi tin tiki gasto di mantencion, ma mi tin mas gasto di lease si.”

Heerenveen ta bisa cu un avion di 30 aña ‘por ta mas nobo cu un di 5 aña’. “Ta trata di e piesanan. Tin piesa cu ta mara na tempo, eseynan bo no tin mag di uza pa mas cu 6 luna te un aña.” Ta remarcabel cu ta menciona su compania di aviacion den relacion cu estafa cu piesa di avion. E hefe di e departamento di mantencion, kende entretanto a haya ontslag, lo tabata envolvi den esaki, mescos cu dos inspector di CCAA cu a pone riba non actief, pendiente di e investigacion.

INFLUENCIA

Experto di aviacion y fundado di AVA Airlines Giovanni Atalita ta haya cu e tipo di avion cu e companianan ta scoge p’e sigur sigur tin influencia riba continuacion di nan existencia. “Tanto DAE como InselAir a scoge pa MD y Fokker: tur dos avion ta traha pa companianan cu entretanto ta falliet. (McDonelDouglas Cororation y Fokker) y no ta modernisa nan. Avionnan manera Airbus of Bombardier CRJ700 ta mas moderno y ta traha mas eficiente por ehempel cu kerosin.

For di partner den noticia Ret Karibense .. Autor Sharina Henriquez  Foto. InselAir