Aruba y Nacionnan Uni y hunto ta celebra Dia Internacional di Felicidad

ORANJESTAD- International Day of Happiness”(IDOH)a wordo funda pa Nacionnan Uni na aña 2012. E concepto tras di e dia aki ta enfoca riba resolucion di Nacionnan uni cu ta reconoce felicidad como un derecho humano como tambe e estado di bienestar di cada persona. E dia di felicidad ta wordo celebra riba 20 di maart y e aña aki Aruba ta anuncia un partnership cu a caba di wordo concretiza cu Nacionnan Uni” International Day of Happiness. Esaki ta inicio di un relacion a largo plaso cu vision di comparti y inspira actonan di felicidad y conforme esaki sigui posiciona Aruba como e isla feliz cu ta pone enfoke riba e aspecto aki tambe. 

“E asociacion aki ta reenforsa loke Aruba ya caba ta enfocando riba dje como destinacion. Felicidad ta mas cu nos lema, cual ta wordo reconoci mundialmente, pero ta parti di nos DNA,” Ronella Tjin Asjoe-Croes, CEO di Aruba Tourism Authority a elabora. “Como e di dos nacion na mundo cu ta mas dependiente di turismo, nos ta balora e felicidad di e comunidad grandemente. Nos comunidad ta e curason y alma di Aruba y nan ta esun cu ta crea felicidad pa otronan, incluso esnan cu ta bishita nos isla”.

No ta solamente e lema “One happy island” ta esun cu ta destaca, pero tambe e hecho cu Aruba ta un di e paisnan mas feliz na mundo, relativo na e tamaño di e isla- esaki ta conforme e estudio di “Happiness Index” cu a tuma luga durante un periodo di 5 aña cu a wordo conduci entre A.T.A. y Rosen College of Hospitality Management University na Central Florida. Caminda resultadonan a demostra cu 78 porciento di e populacion di Aruba ta sinti nan mes contento, y tambe 76 porciento a expresa un satisfaccion a largo plaso cu nan bida. 

Jayme Illien, fundador y presidente ehecutivo di “International Day of Happiness” (IDOH) cu ta un NGO internacional a elabora cu “Aruba ta encarna perfectamente e mision di IDOH’s cu ta perpetua felicidad como un derecho y obhetivo fundamental di cada ser humano. Nos ta kere cu e exito di un nacion tin cu wordo defini mas a leu cu solamente pa e GDP, y pa e motibo aki nos ta aprecia e dedicacion di Aruba pa evalua e prosperidad di e isla no solamente a base di beneficionan tangibel, pero tambe beneficionan intangibel manera e felicidad di e hendenan local.”

E plan di Aruba y IDOH ta pa crece como socio, colaborando cu otro durante henter e aña en connecion cu iniciativanan relaciona cu felicidad y asina facilitando oportunidadnan pa otro organisacionnan y nacionnan pa uni na e esfuerso global aki.

“Aruba ta e prome y unico isla den Caribe cu a tuma iniciativa pa midi e felicidad nacional, y e ta un honor grandi awor pa diferencia nos mes como e prome nacion cu formalmente ta persigui e felicidad door di forma un asociacion cu e Dia Internacional di Felicidad, sanciona pa Nacionnan Uni.” Tjin Asjoe-Croes a indica. 

Awe specificamente, riba Dia Internacional di Felicidad, e ekipo di A.T.A. a dicidi di haci algo diferente y ta pa es motibo aki lo ta bishitando casnan di anciano na Aruba y full rond di mundo na 13 diferente pais, pa asina comparti y trece felicidad bou di nos grandinan. Nan ta esnan cu hopi biaha ta wordo lubida door di comunidad y tin ora door di nan mesun famia. Un di e formanan di encontra felicidad ta bin na momento di duna y yuda bo prohimo y esaki ta loke A.T.A. ta enfocando riba dje e aña aki.