Departamento di Salud Publico ta concientiza comunidad riba nan Salud Oral

ORANJESTAD - Riba 20 di maart, Dia Mundia di Salud Oral, Departamento di Salud Publico (DVG) ta para keto riba e importancia di nos salud oral. Ta clave pa recorda tur hende con importante nos salud oral ta den nos bida. Salud oral ta mas cu’n sonrisa bunita. Nos boca y dientenan tin funcion basico cu nos curpa tin mester di dje, manera e habilidad pa papia, hari, kauw, guli, sunchi y pa demostra nos sentimentonan. 

Ademas, tin un relacion entre enfermedad di carni di diente y riesgo pa desaroya diabetes, enfermedad di curazon, cancer di pancreas y pulmonia. DVG ta promove un bon salud oral fo’i chikito cu diferente programa di concientizacion durante henter aña, manera revision di diente di mucha ora di bay Wit Gele Kruis, revision di diente na scol, ta promove e derecho di uzo di e ‘Sanerings kaart’ di AZV y segun peticion brinda charla educativo di salud oral na scol.          

E aña aki DVG kier promove e importancia pa cuida nos boca y dientenan, tanto cerca mucha como adultonan. Ademas DVG kier concientiza comunidad di e impactonan social (p.e nos ta evita di hari pa motibo di nos dientenan) y economico (tratamento dental tin su gastonan) di e enfermedadnan oral. Un salud oral optimal ta necesario pa mantene nos salud y nos bienestar general. Ora nos mira rond mundo, 90% di e poblacion lo sufri di un malesa oral durante nan bida p.e. caries, enfermedad di carni di djente of cancer oral y Aruba no ta un excepcion.                                                            

Un gradicimento y saludo ta bay na tur esnan cu ta traha den e profesion y contribui na mehora e salud oral di nos comunidad. E aña aki Departamento di Salud Publico kier motiva tur hende pa tuma responsabilidad di nan salud oral cu ta den nan mesun man. Un higiena oral inadecuado ta conduci na acumulacion di resto di cuminda y bacteria riba e dientenan. Esaki na su turno por causa caries y enfermedad di carn’i diente. Ora nos skeiro diente dos biaha pa dia, nos ta kita e resto di cuminda y ta baha e cantidad di bacteria den boca. Haya sa trempan di e enfermedadnan oral ta importante. Bishita bo dentista 2 biaha pa aña ta yuda preveni y trata e condicionnan den boca mas trempan posibel. Asina tur hende por goza di boca y dientenan funcional y saludable for di mucha te na edad halto.

Pa mas informacion por yama 5224200 Departamento di Salud Publico, Seccion Cuido Dental Hubenil.