Dowers: Tur hende tin derecho di haci keho ora di maltrato

ORANJESTAD – “Logicamente tin situacionnan unda cu bo por hayabo den un tension caminda cu cos por bay for di man”. Esey tabata un comentario di minister di husticia Arthur Dowers riba e situacion di polisnan cu recientemente a cay cera, a base di sospecho di e.o. abuso “Un di e puntonan importante ta con bo ta train bo hendenan” e mandatario a sigui bisa. Un di e polisnan en cuestion su caso a bin dilanti caba, y ta tende su sentencia dia 30 di maart proximo. Riba e casonan specifico, e mandatario no por a duna comentario, pero a bisa en general, cu e forma di training cu un polis ta haya, esaki ta importante pa con e ta actua y desaroya su mes den su trabou.

HUSTICIA TUMA NA SERIO

Riba e hecho cu hende ta haciendo keho, tambe e mandatario a reacciona. Aki e mandatario a sigura cu husticia na pais Aruba ta tuma tur caso na serio. “Un hende tin derecho di keha riba tur maltrato cu bo haya” e mandatario a sigui bisa. “Tur instancia momento cu tin un keho, ta tratele den un forma serio” Dowers a sigui bisa. Entre nan tin e famia cu a denuncia tambe un inspector halto di funcion, pero den su caso no a detene. Aki tambe tabatin critica, pero aki tambe recientemente alto comisario di polis tambe a reacciona caba.

CASO MITCH HENRIQUEZ

Ora cu papia di abuso di polis, por corda tambe e caso cu a sosode na Hulanda na 2015, ora cu un arubiano (Mitch Henriquez) a fayece despues cu polisnan a detene, cual detencion a causa basta problema y a resulta fatal pa Henriquez. Mientrastanto ta conoci cu e abogado pa famia di defunto Henriquez tabata na Aruba recientemente y a reuni cu varios instancia entre otro parlamentarionan. NoticiaCla.com tambe a combersa cu e abogado aki e tempo ey. E mandatario a compronde berdad cu e persona aki (e abogado Hulandes) tabata na Aruba, pero no tabatin palabracion pa un reunion tuma lugar entre e abogado y e mandatatrio. “Si nan pidi un cita, claro cu mi lo reuni cu nan” Dowers a sigui bisa. Despues e portal aki a compronde cu a haci un cita pa e encuentro ey.